Teńiz kenishinde karantın taǵy 2 aptaǵa sozyldy
Atyraý oblysynyń Teńiz kenishinde karantın shekteýleri 26 maýsymǵa deıin uzartyldy.
«Epıdemııaǵa qarsy sharalar kúsheıdi. Atap aıtqanda maska rejımi, qoǵamdyq orynda áleýmettik araqashyqtyqty ustaný, nysandarda sanıtarlyq-epıdemıologııalyq talaptardyń saqtalýyna qatysty sharalar qatań baqylaýǵa alyndy. Ónerkásip ornynan jumyskerlerdi shyǵarý nátıjesine qaraı personalǵa qatysty sheshim qabyldanady. Teńizdegi óndiris protsesi toqtamaıtyndyqtan ken ornyna kiretin jumysshylardyń tizimi aldyn ala daıyndalady. Vahtaǵa deıingi bes kún ishinde olar tes tapsyryp, oqshaýlanýy tıis. Tek altynshy kúni ǵana indet juqtyrmaǵany belgili bolǵan soń jumysqa kirisedi» delingen Jylyoı aýdany bas memlekettik sanıtar dárigeriniń habarlamasynda.
Teńizden úıine qaıtatyn jumyskerlerge de osyndaı algorıtm qoldanylady. Jumysshy test tapsyrady, bes kún oqshaýlanady. Koronavırýs joq bolsa úıine qaıtady. Tek ol 14 kún boıy úıinen shyqpaı, karantınde otyrýy kerek.
Odan bólek, bas sanıtar arnaıy qaýly shyǵaryp, densaýlyq saqtaý basqarmasy men «Teńizshevroıl» JShS-ne ken ornyndaǵy barlyq jumysshyny ári qaraı da PTR testileý arqyly teksere berýdi tapsyrdy.
Kenishke kireberis pen shyǵaberistegi blokpostar ázirge alynbaıdy.
