Teńiz ken ornynda jarylystan jaraqat alǵandardyń ekeýi aýrýhanaǵa jetkizildi
Budan buryn Teńiz ken ornynda jarylys bolyp, eki adam qaza tapqanyn jazǵan edik.
«Teńizshevroıl» JShS baspasóz qyzmetinen málim etkendeı, búgin, 6 shildede «Senimdi qurylys» JShS-niń qurylys alańynda atmosferalyq gazy bar qubyrda gıdrosynaý jumysy júrgizilgen. Sol kezde qysymǵa shydamaǵan qubyrda jarylys bolǵan.
Jergilikti ýaqytpen tańerteńgi saǵat 9:55 shamasynda bolǵan jarylys saldarynan merdigerlik kompanııa – «Senimdi qurylys» JShS-niń 5 qyzmetkeri zardap shekken. Onyń 3-eýi ártúrli dene jaraqatyn alǵan. Al, 2 qyzmetker qaza tapqan.
«Apat kezinde ken ornynda 5 jumysshy zardap shegip, onyń ekeýi qaıtys boldy. Bireýi jarylys bolǵan qurylys alańynda, ekinshisi ken ornyndaǵy «TShO klınıkasy» medıtsınalyq mekemesinde kóz jumǵan. Ártúrli dene jaraqatyn alǵan jumysshynyń bireýi «Teńizshevroıl» JShS-ne qarasty ushaqpen Atyraý oblystyq aýrýhanasyna jetkizildi. Qazir naýqasqa dárigerler saraptama júrgizip jatyr. Taǵy bir jaraqat alǵan jumysshy Jyloı aýdandyq aýrýanasyna tústi. Ol jambas tusynan jabyq jaraqat alǵan. Onyń jaǵdaıy ortasha turaqty. Zardap shekken úshinshi jumysshyǵa «TShO klınıkasy» medıtsınalyq mekemesiniń qyzmetkerleri psıhologııalyq kómek kórsetip jatyr», -dep málim etti oblystyq densaýlyq saqtaý basqarmasynyń baspasóz qyzmetinen.
