Teńiz ken ornynda jarylys bolyp, eki adam qaza tapty

ATYRAÝ. QazAqparat – Atyraý oblysynda ornalasqan Teńiz ken ornynda jarylys boldy. Jarylystan eki adam qaza tapty. Al, úsh adam ártúrli dene jaraqatyn alǵan, dep habarlaıdy QazAqparat tilshisi.

Bul derekti Atyraý oblystyq polıtsııa departamentiniń baspasóz qyzmeti rastady.

Teńiz ken ornyndaǵy jarylys búgin, 6 shildede jergilikti ýaqytpen saǵat 09:55 shamasynda bolǵan.

Bizge málim derekke qaraǵanda, ken ornyndaǵy atmosferalyq gazy bar qubyrda gıdrotest júrgizilgen. Qysymǵa tótep bere almaǵan qubyr jarylyp ketken.

Jarylystyń saldarynan oqıǵa ornynda eki jumysshy kóz jumdy. Al, úsh adam ártúrli dene jaraqatyn alyp, medıtsına qyzmetkerlerine júgingen.

«Jylyoı aýdanynda ornalasqan Teńiz qalashyǵynda qubyr jarylyp, sonyń saldarynan 1985 jyly týǵan eki qyzmetker qaıtys boldy. Úsh adam jaraqattandy. Zardap shekken 3 qyzmetkerge medıtsınalyq kómek kórsetilip jatyr», - dep málim etti polıtsııa departamentiniń baspasóz qyzmetinen.

Qazir atalǵan fakti boıynsha QR Qylmystyq kodeksi 156-babynyń 3-bólimimen sotqa deıingi tergeý amaldary bastaldy. Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.

Ken ornyndaǵy jarylysqa baılanysty atmoferalyq gazy bar qubyrda gıdrotest júrgizý jumystary tolyǵymen toqtatyldy. Tıisti organdar tehnıkalyq qaýipsizdik talabynyń saqtalýyna baılanysty tekserýdi bastady.

Eske sala ketelik, budan buryn Teńiz ken ornynda merdiger mekemeniń tsehy órtengenin habarlaǵan edik.