Teńiz ken ornynda 500 adam koronavırýstan emdelip jatyr

ATYRAÝ. QazAqparat – Atyraý oblysynda koronavırýs juqtyryp, jaǵdaıy nasharlaǵan 15 naýqas jansaqtaý bóliminde jatyr, dep habarlaıdy QazAqparat.

Buǵan deıin Densaýlyq saqtaý mınıstri Ajar Ǵınııat Atyraýdaǵy Teńiz ken ornynda sanıtarlyq talaptardy kúsheıtýdi tapsyrǵanyn jazǵan edik. Qazir Atyraý oblysynda 4 448 adam koronavırýs ınfektsııasymen aýyryp jatyr.

Keshe munaıly óńirde qaýipti vırýsty juqtyrǵan 556 naýqas anyqtaldy. Al, Teńiz ken ornynyń 40 jumysshysynan koronavırýs ınfektsııasynyń belgisi tabyldy. Qazir atalǵan ken ornyndaǵy ınfektsııalyq statsıonarda emdelip jatqan naýqastardyń sany 500 adamǵa jetti.

«Óńirdegi 2 360 oryndyq ınfektsııalyq statsıonarlarda 832 naýqas em qabyldaý úshin oqshaýlandy. Mundaǵy júkteme – 35,2%. Statsıonarlardaǵy 106 tósek-orny bar jansaqtaý bóliminde jaǵdaıy aýyr 15 naýqas emdelip jatyr. Onyń ishinde 3 patsıent ókpeni jasandy jeldetý apparatyna qosylǵan. Bul bólimdegi júkteme – 14,1%», -dep málim etti oblystyq densaýlyq saqtaý basqarmasynyń baspasóz qyzmetinen.

Eske sala ketelik, budan buryn atyraýlyq dáriger Omıkron shtamy mýtatsııaǵa ushyrap, tez ózgeretini týraly pikir bildirgen bolatyn.