Tengri Camp: Qazaq kıiz úıi álem sahnasynda
ASTANA. KAZINFORM – Álemge áıgili Burning Man festıvalinde Qazaqstan alǵash ret erekshe úlgide tanystyryldy. Ashat Murat bastaǵan qazaqstandyq entýzıastar Tengri Camp dep atalatyn etno-lager quryp, ulttyq mádenıetimizdi álemge kórsetti.
– Ótken jyly AQSh-qa oqýǵa baryp qaıttym. Sol kezde meniń barlyq professorlarym Burning Man festıvali týraly aıtty. Ol festıvalǵa qatysyp ta kórdim. Óte qyzyq shara. Ondaǵy atmosferany kórgennen keıin bizdiń qazaqstandyq talantty jastardyń basyn qosyp, ulttyq ıdeıamen festıvalǵa bara alamyz degen sheshimge keldim, – deıdi Tengri Camp jobasynyń avtory Jibek Joly telearnasynyń «Búgin LIVE» baǵdarlamasyna bergen suhbatynda.
Ashat Murat bul sharaǵa qatysý úshin 1 jyl boıy daıyndalǵandaryn aıtady.
– Festıvalǵa qatysý úshin 1 jyl boıy daıyndaldyq. Eń birinshi adam jınaý kerek. Ol arzan jumys emes. Oǵan kez kelgen adam bara almaıdy. Sebebi, qarjylyq shyǵyndar, aýa raıynyń qolaısyzdyqtary bar. Elimizden kıiz úı aparyp tigý de ońaı bolǵan joq. Ákimdik pen mınıstrlikterden kóptegen qujattardy jınadyq. Keden, logıstıka máseleleri bar. Áýeli Talǵardan Qytaıǵa temirjol arqyly apardyq. Keıin teńizben Los-Andjeleske jetkizdik. Sosyn mejeli orynǵa avtokólikpen tasydyq, – deıdi ol.
Osynsha qıyndyqpen jetkizilgen kıiz úıdi qolaısyz aýa raıynda qurastyrý da ońaıǵa soqpapty.
– Kıiz úıdi qurý kezinde 3 ret boran soqty. Eń birinshi boran soqqanda biz kıiz úıdiń qańqasyn quryp úlgermeı qaldyq. Komanda sol kezde kıiz úıdi 3 saǵat boıy qolmen ustap, tirep turdy. Ekinshi kúni bárin tolyqtaı bitirip úlgerdik. Eń qatty boran soqqan kezde ózge shatyrlardyń bári ushyp ketti. Tek bizdiń kıiz úıimiz ǵana sol qalpy turdy. Sol kezde adamdardyń bári ne isterin bilmeı, bizdiń kıiz úıimizge keldi. Biz olardy tamaqtandyryp, jylytyp, qolymyzdaǵynyń bárin berdik. Kelesi kúni bári bizge alǵysyn jaýdyrdy. Kıiz úıdi AQSh-tan tabý múmkin bolmady. Jalpy tarıhta alǵash ret AQSh-ta osyndaı úlken kıiz úı tigilip tur, – deıdi stýdııa qonaǵy.
Joba avtorynyń aıtýynsha, Tengri Camp Qazaqstanǵa myńdaǵan týrıst tartýǵa sep bolǵan.
– Ondaǵy kelýshilerdiń áserin kórý de qyzyq. Árbir adam osyndaı qonaqjaılyqty kórip: «Biz endi Qazaqstanǵa baramyz» dep aıtty. Al elge týrıst tartý – bizdiń eń birinshi maqsatymyz. Osy Tengri Camp arqyly biz Qazaqstan týraly myńdaǵan jarnamany jasaı aldyq dep oılaımyn, – deıdi Ashat Murat.
Aıta keteıik, birer kim buryn Prezıdent Qasym-Jomart Toqaev 2025 jylǵy 8 qyrkúıektegi Qazaqstan halqyna Joldaýynda týrızm salasyndaǵy túıtkildi máselelerge nazar aýdarǵan edi.