«Tengri Bank» salymshylaryna 8 saǵatta 4,8 mlrd teńge qaıtaryldy

ALMATY. QazAqparat – 30 qyrkúıekte Qazaqstannyń depozıtterge kepildik berý qory (QDKQ) «Eýrazııalyq bank» AQ arqyly «Tengri Bank» AQ salymshylaryna kepildik berilgen ótemdi tóleýdi bastady, dep habarlaıdy QazAqparat tilshisi.

Saǵat 17:00-degi jaǵdaı boıynsha, agent-bank Qazaqstannyń depozıtterge kepildik berý qory esebinen azamattarǵa shamamen 4,8 mlrd teńge aqshasyn qaıtardy. Bul «Tengri Bank»AQ salymshylarynyń aldynda kepildik berilgen ótem somasy boıynsha mindettemelerdiń jalpy kóleminiń 27% quraıdy.

QDKQ-dan málim etkendeı, kepildik berilgen ótemdi tóleý rekordtyq qysqa merzimde – «Tengri Bank» AQ barlyq bank operatsııalaryn júrgizýge arnalǵan lıtsenzııasynan aıyrylǵan kúnnen bastap 8 jumys kúninen keıin bastaldy.

«Salystyrý úshin aldyńǵy bankter boıynsha tólemniń bastalý merzimi olardy qarjy retteýshisi lıtsenzııasynan aıyrǵannan keıin 80-nen 107 jumys kúnine deıin boldy.

Salymshylarǵa qarajatty jedel tóleý 2020 jylǵy 1 qańtardan bastap qoldanysqa engizilgen jáne 2019 jyly Qordyń usynysy boıynsha Qazaqstan Ulttyq bankimen birlesip jasaǵan zańnamalyq ózgeristerdiń arqasynda múmkin boldy. Osy ózgeristerge sáıkes Qor sot sheshimin kútpeı-aq, ózine kepildik berilgen ótemdi tóleý boıynsha mindettemelerdi qabyldaıdy», - dedi QDKQ-dan.

«Tengri Bank» AQ salymshylary óz aqshasyn qaıtaryp alý úshin «Eýrazııalyq bank» AQ-nyń kez kelgen fılıaly nemese bólimshesine baryp, ótinish toltyrýlary qajet. Salymshylar óteý somasyn «Eýrazııalyq bank» AQ saıtynda onlaın teksere alady.

Eske salaıyq, 2020 jyldyń 18 qyrkúıeginde QR Qarjy naryǵyn retteý jáne damytý agenttigi «Tengri Bank» AQ-ny barlyq bank operatsııalaryn júrgizý lıtsenzııasynan aıyrý týraly sheshim qabyldaǵan bolatyn.