Tengri Bank salymshylaryna 10,7 mlrd teńge tólendi
Qazaqstannyń depozıtterge kepildik berý qory agent bank retinde tańdap alǵan Eýrazııalyq bank arqyly «Tengri Bank» AQ salymshylaryna alǵashqy 5 kún ishinde 10,7 mlrd teńge tólendi.
«Bul kepildik berilgen ótemdi tóleý boıynsha qor mindettemeleriniń jalpy somasynyń 60,4 paıyzyn quraıdy. Ótem alý boıynsha agent bankke «Tengri Bank» AQ-tyń 2,3 myńdaı salymshysy ótinish berip úlgerdi. Olardyń kópshiligi Almatydan – 599 adam. Pavlodardan – 328, al Nur-Sultan qalasynan – 319 adam. Qazaqstan Respýblıkasy oblystarynyń basym bóligindegi salymshylar aldyndaǵy ótelgen mindettemelerdiń úlesi 50 paıyzdan joǵary», delingen habarlamada.
Eýrazııalyq banktiń onlaın-servısteri salymshylarǵa kezekke turýdy qaraýǵa, bólimshelerdegi jumysbastylyqty baǵalaýǵa, kepildik berilgen ótem somasyn tekserýge, sondaı-aq karta jasap shyǵarý jáne ony tegin jetkizý jóninde qashyqtan ótinish berý arqyly tólemderdi qashyqtan alý optsııasyn paıdalanýǵa múmkindik berdi.
Kelip túsken ótinishterdiń statıstıkasyna sáıkes, alǵashqy kúni tólem kartasyn shyǵarý 2,5 esege ósken.
Tengri Bank salymshylary kepildik berilgen ótemdi kartaǵa aýdarýdan basqa, ony Eýrazııalyq banktiń bólimshelerinen myna tásilder boıynsha ala alady: Agent banktiń kassasynan qolma-qol aqshamen; Aqshany agent banktegi bank shotyna nemese kez kelgen basqa bankke aýdarý arqyly. Ótemdi alý tásilin salymshylary ózderi tańdaıdy.
Eske salaıyq, 2020 jyldyń 18 qyrkúıeginde QR Qarjy naryǵyn retteý jáne damytý agenttigi «Tengri Bank» AQ-ny barlyq bank operatsııalaryn júrgizý lıtsenzııasynan aıyrý týraly sheshim qabyldaǵan bolatyn.
