Tengri Bank resmı túrde jabyldy

NUR-SULTAN. QazAqparat – Almaty qalasynyń mamandandyrylǵan aýdanaralyq ekonomıkalyq sotynyń «Tengri Bank» AQ qyzmetin májbúrli túrde toqtatý týraly sheshimi zańdy kúshine endi, dep habarlaıdy QazAqparat tilshisi Zakon.kz saıtyna silteme jasap.

Qarjy naryǵyn retteý jáne damytý agenttigi tóraǵasynyń buıryǵymen bankti taratý komıssııasynyń quramy taǵaıyndalǵan. Qoldanystaǵy zańnama sheńberinde oǵan bank isin basqarý ókilettiligi beriledi.

Bankti taratý komıssııasynyń tóraǵasy bolyp atalǵan agenttiktiń qyzmetkeri Ogaı Oksana Dmıtrıevna taǵaıyndaldy.

«Zań talaptaryna sáıkes endi úsh jumys kúni ishinde bankti májbúrlep taratý týraly sot sheshimi jáne ýákiletti organnyń taratý komıssııasyn taǵaıyndaýy týraly habarlama kópshilikke jarııa etilip, onyń ishinde banktiń ınternet-resýrsynda da ornalastyrylady. Al on jumys kúni ishinde bul aqparatty Qazaqstan Respýblıkasy Ádilet mınıstrliginiń resmı basylymdary qazaq jáne orys tilderinde jarııalaýǵa tıis», - dep habarlady Qarjy naryǵyn retteý jáne damytý agenttiginiń baspasóz qyzmeti.

Esterińizge sala ketsek, Qarjy naryǵyn retteý jáne damytý agenttigi Tengri Bank-ti banktik jáne ózge de operatsııalardy júrgizý jónindegi lıtsenzııasynan aıyrǵan bolatyn.