Teńgeniń álsireýine áser etken 3 faktor ataldy

ASTANA. KAZINFORM – Teńge baǵamynyń álsireýine negizgi úsh faktor áser etip otyr. Bul týraly Úkimette ótip jatqan brıfıngte Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtty.

- Sońǵy birneshe aptada valıýta naryǵynda belgili bir qubylýlar baıqalyp otyr. Bul ulttyq valıýta baǵamynyń álsireýinen kórinis tapty. Ótken aptada AQSh dollarynyń baǵamy 500 teńgeden asty. Osyǵan baılanysty bıznes pen azamattarymyzdyń alańdaýshylyǵyn túsine otyryp, Úkimet pen Ulttyq bank valıýta naryǵyndaǵy turaqtylyqty qamtamasyz etý boıynsha kelisilgen sharalardy qabyldaýda, - dedi ol.

Osy oraıda vıtse-premer ulttyq valıýta baǵamyn túzetý irgeli syrtqy faktorlardyń áserinen ǵana týyndaıtyn qubylys ekenin atap ótti.

- Olardyń ishinde negizgi úsheýin bólip kórsetýge bolady. Birinshi faktor – sońǵy aılarda dollar ındeksiniń jahandyq nyǵaıýy. Ekinshi faktor – álemdik munaı baǵasynyń tómendeýi. Al sońǵy mańyzdy faktor – Reseı rýbliniń álsireýi. Reseı bizdiń negizgi saýda seriktesimiz ekenin eskersek, rýbl baǵamynyń qubylýy teńge baǵamyna áser etýi múmkin. Azamattarymyzdyń áleýmettik jaǵdaıy men ál-aýqatynyń nasharlaýyna jol bermeý jáne kásipkerlerge teris áserin azaıtý Úkimettiń basty mindeti. Ekonomıka men halyq úshin yqtımal teris saldardy turaqtandyrý ári barynsha azaıtý úshin barlyq qajetti shara qabyldanady. Bul úshin Úkimette resýrstar men quraldar jetkilikti», - dedi Nurlan Baıbazarov.

Eske salsaq, jýyrda Ulttyq bank bazalyq mólsherlemeni 15,25%-ǵa deıin kóterdi.

Sondaı-aq Ulttyq bank tóraǵasy Tımýr Súleımenov dollar baǵamynyń ózgerýi ımport taýarlary qunyna áser etýi múmkin ekenin aıtty.

Osyǵan deıin QR Ulttyq banki tóraǵasynyń orynbasary Vıtalıı Týtýshkın dollar baǵamynyń 600 teńgege deıin ósýi múmkin be degen suraqqa jaýap berdi.