Teńge jyl basynan 4,6 paıyzǵa álsiredi
ASTANA. KAZINFORM - Ulttyq bank teńgerimsizdiktiń jınaqtalýyn boldyrmaıtyn ıkemdi baǵam qalyptastyrý rejımin ustana beredi. Bul týraly búgin Úkimet otyrysynda Ulttyq bank tóraǵasynyń birinshi orynbasary Erulan Jamaýbaev aıtty.
- Jyl basynan beri teńge baǵamy negizgi ishki faktorlar aıasynda 1 AQSh dollary úshin 549,07 teńgege deıin 4,6 paıyzǵa álsiredi. Negizgi ishki faktorlar – ekonomıkany fıskaldyq yntalandyrý, sondaı-aq iri kompanııalardyń dıvıdend tóleýi aıasynda ımporttyń ulǵaıýy saldarynan shetel valıýtasyna suranys óskeni baıqaldy, - dedi ol.
Onyń atap ótýinshe, ulttyq valıýtanyń aıyrbas baǵamyn qoldaý Ulttyq qordan bıýdjetke beriletin transfertterden shetel valıýtasyn satý esebinen júzege asyrylyp otyr.
- Onyń kólemi osy jyl basynan qyrkúıek aıyna deıin 6,6 mlrd AQSh dollary boldy. Sonymen qatar 4,3 mlrd AQSh dollaryna altyn satyp alýdy teńestirý operatsııalary júzege asyryldy. Qabyldanǵan sharalar nátıjesinde valıýta naryǵy qazir teńgerimdi kúıde saqtalyp otyr. Ulttyq bank teńgerimsizdiktiń jınaqtalýyn boldyrmaıtyn ıkemdi baǵam qalyptastyrý rejımin ustana beredi, - dedi Erulan Jamaýbaev.
Aıta keteıik, Úkimet otyrysynda 2025 jylǵy qańtar-qyrkúıek aılaryndaǵy áleýmettik-ekonomıkalyq damý qorytyndylary men respýblıkalyq bıýdjettiń atqarylý barysy talqyǵa salyndy.