Teńge baǵamynyń ózgerýi BJZQ ınvestıtsııalyq tabystylyǵyna qalaı áser etti
«Investıtsııalyq tabystylyq alǵashqy jartyjyldyqta ınflıatsııaǵa qaraǵanda óte aýqymdy boldy. Belgili bir dárejede oǵan valıýta baǵamynyń ózgerýi yqpal etti. Ózderińiz bilesizder, Ulttyq bank portfeldiń valıýtalyq jaǵyn jaqsartyp jatyr. Bul byltyr qabyldanǵan sheshim bolatyn», - dedi Nurbúbi Naýryzbaeva.
Onyń aıtýynsha, tabystyń 70%-y baǵaly qaǵazdar, depozıtter, REPO operatsııalary boıynsha syıaqydan túsken. Al olardyń basym kópshiligi teńgemen qaıtarylady.
«Tabystyń 20%-y ǵana shetel valıýtasynyń arasyndaǵy aıyrma bolyp tabylady. Biraq, bul jerde de tabystyń 20 paıyzy tek qana teńgeniń kúsheıýinen tústi dep aıta almaımyz», - dedi ol.
2018 jyldyń 1 shildesine qaraı zeınetaqy jınaqtarynyń jalpy somasy 8,4 trıllıon teńgeni qurap, jyl basynan beri 663,6 mlrd teńgege nemese 9 paıyzǵa ósti.
2018 jyldyń alǵashqy jartysynda salymshylar men alýshylardyń zeınetaqy shottaryna eseptelgen taza ınvestıtsııalyq tabys somasy 356,4 mlrd teńge boldy. Jyl basynan beri tabystylyq 4,5 paıyzǵa jetti. Bul kezeńde ınflıatsııa deńgeıi 2,6 paıyz boldy. Al jyldyq turǵyda alyp qaraıtyn bolsaq, Qordyń zeınetaqy aktıvteriniń tabystylyǵy 2017 jyldyń 1 shildesi men 2018 jyldyń 1 shildesi aralyǵynda 9,5 paıyzdy qurap otyr. Al bul kezeńdegi ınflıatsııa deńgeıi 5,9 paıyz boldy.
Aǵymdaǵy jyldyń alǵashqy alty aıy ishinde zeınetaqy jarnalary boıynsha túsimderdiń jalpy somasy 407,5 mlrd teńgege (keri qaıtarylǵan jarnalardy esepke almaǵanda) jetti. Bul ótken jyldyń sáıkes kezeńimen salystyrǵanda (366,4 mlrd teńge bolǵan) 11 paıyzǵa joǵary. Bul rette túsimderdiń negizgi úlesi mindetti zeınetaqy jarnalaryna tıesili.