Temu Qytaıdan AQSh-qa jetkizilimdi toqtatty
ASTANA. KAZINFORM — Temu Qytaıdan AQSh-qa tikeleı jetkizýdi toqtatatynyn málimdedi. Endi amerıkalyqtar marketpleısten tek AQSh aýmaǵyndaǵy qoımalarda bar taýarlardy ǵana satyp ala alady.
Bul qadam arqyly Temu Tramp ákimshiligi engizgen qytaılyq ımportqa salynǵan qosymsha salyqtardy aınalyp ótýdi kózdeıdi.
Osy jyldyń 2 mamyrynda Aq úı burynǵy de minimis erejesiniń kúshin joıǵanyn resmı túrde jarııalady. Bul ereje boıynsha AQSh-qa jiberiletin quny $800-den aspaıtyn shaǵyn sálemdemelerge salyq salynbaıtyn. Osy jeńildik arqasynda Temu, Shein jáne AliExpress sııaqty iri qytaılyq marketpleıster AQSh-qa sapasy onsha emes, arzan taýarlardy jappaı eksporttap keldi. Resmı málimetterge sáıkes, AQSh kúnine Qytaıdan 4 mıllıonǵa deıin arzan sálemdeme qabyldaǵan.
Endi bul aǵym múlde toqtamasa da, aıtarlyqtaı azaıady. Qazirgi erejege sáıkes, Qytaıdan kelgen barlyq sálemdemelerge taýar baǵasynyń 120%-y kóleminde salyq nemese árbir sálemdemege $100 kóleminde turaqty salyq salynady. 1 maýsymnan bastap bul salyq mólsheri eki ese ósedi, dep josparlanǵan.
Prezıdent Donald Tramp de minimis erejesin joıýdyń eki negizgi sebebin atady. Birinshisi — shaǵyn jáne orta bıznesti ádiletsiz básekeden qorǵaý. Onyń aıtýynsha, arzan ári sapasyz taýarlardy usynatyn qytaılyq marketpleıster men olardyń agressıvti jarnama saıasaty — «shaǵyn bızneske qarsy baǵyttalǵan alaıaqtyq».
Ekinshi sebep — esirtki tasymalymen kúres. Aq úıdiń resmı saıtynda Qytaıdan kelgen zańdy sálemdeme retinde jasyrylǵan tyıym salynǵan zattar, atap aıtqanda fentanıl jáne basqa sıntetıkalyq opıoıdtar elge kirip jatqanyn málimdegen.
Buǵan deıin Tramp ákimshiligi Qytaı ımportyna salynatyn salyqty 145%-ǵa deıin kótergen bolatyn. Bul birinshi kezekte iri marketpleısterge áser etti. Máselen, jyldam sán ónimderin satatyn Shein keıbir taýarlaryna baǵany 300%-ǵa deıin kóterse, Temu ımporttyq salyqtary keıbir taýarlardyń óz baǵasynan asyp ketti. Sonymen qatar, eki platforma da AQSh-taǵy jarnama shyǵyndaryn kúrt qysqartty.
Osylaısha, AQSh ishki naryǵyn jáne óz shaǵyn jáne orta bıznesin syrtqy ekspansııadan qorǵaı bastady. Al Qazaqstanda bolsa, qytaılyq marketpleıster kerisinshe kúsheıip keledi, sebebi olar qazaqstandyq naryqta jergilikti kásipkerlermen salystyrǵanda anaǵurlym tıimdi sharttarǵa ıe.