Temirjolshylar bıyl 106,5 mln tonna kómir tasymaldamaq - QTJ
«Qazaqstan temirjoly» kompanııasynyń málimetinshe, temirjol arqyly 56 mıllıon tonna júk ttasymaldanǵan. Onyń 4,5 mıllıon tonnasy kommýnaldyq -turmystyq maqsatqa baǵyttalǵan.
«QTJ-Júk tasymaly» AQ bas dırektorynyń mindetin atqarýshy Muqtar Jambylovtyń habarlaýynsha, jyl aıaǵyna deıin 106,5 mıllıon tonna kómir tasymaldanbaq. Onyń 71,9 mıllıon tonnasy tutynýshylarǵa baǵyttalsa, 34,6 mıllıon tonnasy eksportqa jiberiledi.
«QTJ» bastamashylyǵymen osyndaı keńester óńirlerde jergilikti atqarýshy organdar, kómir kenderi jáne basqa da múddeli taraptardyń qatysýymen turaqty negizde ótkizilip keledi. Ol kezdesýlerde kómir jetkizý kestesi men josparyn 4-toqsannan birkelki etip 2-3-shi toqsanǵa bólý kózdeledi.
«Ótken jyly osyndaı uıymdastyrý jumystary jylý berý kásiporyndaryndaǵy normatıvtik qordy tıimdi qamtamasyz etýge múmkindik berdi», - deıdi «QTJ-Júk tasymaly» AQ bas dırektorynyń mindetin atqarýshy Qaırat Sáýirbaev.
Q. Sáýirbaevtyń habarlaýynsha, aǵymdaǵy jyly Shyǵys Qazaqstan men Pavlodar oblystarynyń ákimdikterinde kúzgi maýsymda jetkiziletin kómir jazǵy maýsymǵa qaıta bólinip, tamyz aıynyń aıaǵyna deıin Jylý ortalyqtarynyń normatıvtik qoryn saqtaýdyń joly qarastyryldy.
Keńeste tutynýshylardy kómirmen turaqty qamtamasyz etý jáne olarǵa tıesili jyljymaly quram tapshylyǵyn joıý, vagondardyń kire beris joldarda turyp qalýyn boldyrmaý, kórshiles memleketterden kelgen vagondardyń der kezinde qaıtarylýyn qamtamasyz etý týraly máseleler qaraldy.
Bıylǵy jeti aıda kómir kenderiniń kire beristerinde vagon aınalymynyń ortasha normasy 11,7 saǵat bolsa, is júzinde 24,2 saǵatqa sozyldy. Osylaısha, jyl basynan beri vagon aınalymy normasy oryndalmaýy saldarynan 70 myńnan astam vagon júk tıeý resýrsy joǵalǵandyǵy aıtyldy.
«Ulttyq tasymaldaýshy qyzmet kórsetý sapasyn kóterý úshin barlyq ózekti jaılardy jedel túrde ashyq talqylaýǵa múddeli», - deıdi Q. Sáýirbaev.
