Temirtaýlyq kásipker sańyraýqulaq ósirip, tabysqa kenelýde

TEMІRTAÝ. QazAqparat – Metallýrgter qalasynyń turǵyny Raıymgúl Bazarbek Temirtaý qalasy ákiminiń grantyna ıe bolyp, shampınon ósiretin ferma ashty. Kásipker áıel bastapqyda óziniń tabysyna senip, shaǵyn kásipkerlikti qoldaý baǵdarlamasyna qatysýǵa sheshim qabyldady, dep habarlaıdy QazAqparat tilshisi.

Aýyl sharýashylyǵyn damytý basym baǵyt bolyp tabylady. Sańyraýqulaq fermasyn damytý ıdeıasyna granttardy bólý jónindegi komıssııa oń baǵa berdi.

«Burynnan bıznespen aınalysqym keldi, biraq qarajat qajet boldy. Sańyraýqulaq ósirýge qyzyǵýshylyq tanyttym. Internettegi kóptegen maqalalardy zerdelep, Qaraǵandy men Temirtaý naryǵyn zerttedim. Bıznes-jobany jasaǵan kezde, bul tıimdi bıznes ekeni belgili boldy. Óteý merzimi óte qysqa. Mıllıon teńgege grantty osyndaı qasıetterge baılanysty utyp aldym dep oılaımyn. Jumysyma jubaıym Tilegen kómektesedi. Bizdiń bıznesimiz otbasylyq», – deıdi Raıymgúl Bazarbek.

Kásipker shampınon ósirýmen aınalysady. Onyń aıtýynsha, bul óte kúrdeli sańyraýqulaq. Internettegi aqparat, árıne, paıdaly boldy, biraq osy baǵytta arnaıy oqyǵan.

«Almatyda agrarlyq salanyń kórmesi ótken kezde, ol sharaǵa Týladaǵy kompanııa ókilderi qatysqan bolatyn. Sodan keıin olar maǵan keldi. Tehnologııalyq protsesti retteýge, Reseıden shıkizat tabýǵa kómektesti. Olar nólden bastap alǵashqy ónim alýǵa deıin qoldaý kórsetti dep aıta alamyn», – deıdi kásipker.

Jalǵa alynǵan úı-jaıda erli-zaıyptylar bes tonna sańyraýqulaq otyrǵyzdy. Alǵashqy ónim 33 kúnnen keıin jınaldy. Tájirıbeli kásipqoılardyń ózi temirtaýlyq bıznesmenge az ýaqyt qajet bolǵanyna tań qaldy. Ádette sańyraýqulaqtar 45 kún ósedi. Satýǵa keletin bolsaq, ónimderdi kókónis pavılondary, meıramhanalar men kafeler qabyldaıdy.

Alǵashqy aınalymnan túsken qarajatqa sańyraýqulaq ósirýshi ekinshi kamerany 10 tonnaǵa jabdyqtamaqshy.