Temirtaýdyń ońaltý ortalyǵynda 660 bala tegin qalpyna keltirý kýrsynan ótti

TEMІRTAÝ. QazAqparat – Temirtaý qalasynyń «Bala» ınklıýzıvti balalar ońaltý ortalyǵynda aýyr jaraqattardan keıin qalpyna keledi, ortopedııalyq jáne kardıologııalyq dertter kezinde, sondaı-aq sal aýrýy, entsefalopatııa jáne t.b. kezinde em alady. Munda bir jyl ishinde 660 jas patsıent kómek aldy, dep habarlaıdy QazAqparat tilshisi.

Temirtaýdyń on tórt jasar turǵyny bıikten qulaǵannan keıin jambas jáne san súıekteri synǵan soń ońaltý ortalyǵyna túsken. Bıyl qańtar aıynyń basynda qyz balaǵa ota jasaldy. Bir aıdan keıin gıps alynyp tastalǵan soń ony «Bala» ortalyǵyna jibergen. Qabyldaý kezinde naýqas tipti otyra almaǵan, ony ata-analary kóterip alyp kelgen. Massaj, magnıttik terapııa, trenajerlardaǵy sabaqtardyń arqasynda ol júre bastady. Qazir ol bir baldaqpen qozǵalady. Dárigerler patsıent úıine shyqqan soń ózdiginen júre alady dep úmittenedi.

«Operatsııadan keıin bizge qyzym júre almaı qalýy múmkin dep aıtty. Biraq ońaltý ortalyǵynda ol aıaǵyna turdy. Aldymen súıemeldeý arqyly, sodan keıin baldaqpen júre bastady. Mundaı ońaltýdyń aqysyz bolýy óte mańyzdy. Men balamdy aıaqqa turǵyzyp, osyndaı kásibı kútimdi qamtamasyz ete almas edim», — deıdi naýqastyń anasy Gúljas Ómirbekova.

Aýrýdyń dıagnozy men aýyrlyǵyna baılanysty ońaltý kýrsy 14 kúnge sozylady. Osy ýaqyt aralyǵynda patsıentter massaj, trenajerlardaǵy sabaqtar, magnıtoterapııa, press-terapııa, elektrmen emdeý, ýltradybystyq, parafın terapııasy, pedagogıkalyq túzetý — logoped, defektolog, psıhologpen sabaqtar ótkizedi.

«Travmatologııalyq beıindegi patsıentter kezeksiz túsedi. Olar úshin biz árqashan oryndar qaldyramyz. Qazir bizde jaqsy tájirıbe qalyptasqan - travmatologtar kóp ýaqytyn joǵaltpaı birden ońaltýǵa jiberedi. Josparly ońaltýdan osyǵan deıin de ótken patsıentter kelesi kýrstyń qashan bolatynyn bile otyryp, aldyn-ala kezekke turady. Barlyq qalpyna keltirý emi MÁMS aıasynda tegin kórsetiledi», — dedi «Bala» balalardy ońaltý ınklıýzıvti ortalyǵynyń dırektory Elena Lı.