Temirtaýda mektepke «bomba qoıǵan» kúdikti izdestirilip jatyr

TEMІRTAÝ. QazAqparat - Qaraǵandy oblysynyń polıtseıleri Temirtaý mektepterinde jarylǵysh zat bar dep habarlaǵan belgisiz azamat izdestirip jatyr, dep habarlaıdy QazAqparat tilshisi.

Búgin túnde Temirtaý polıtsııasyna qaladaǵy mektepterdiń birine bomba qoıyldy degen aqparat tústi.

Oqıǵa orynyna jedel qyzmetter jumyldyryldy.

Polıtsııa qyzmetkerleri ǵımaratty tekserdi. Eshqandaı jarylǵysh zat tabylǵan joq.

«Atalǵan derek boıynsha Qazaqstan Respýblıkasy Qylmystyq Kodeksiniń 273-babyna sáıkes qylmystyq is qozǵaldy. Qazirgi ýaqytta polıtsııa qyzmetkerleri kúdiktini anyqtaý boıynsha keshendi jedel-izdestirý is-sharalaryn júrgizip jatyr», - dep málimdedi Qaraǵandy oblysynyń PD baspasóz qyzmeti.

Atalmysh habarlamaǵa baılanysty Temirtaý qalasynda barlyq mektepter men balabaqshalar tekserildi.

Esh jerden jarylǵysh zat tabylǵan joq.