Temirtaýda balabaqsha men emhanalar jetispeýshiligi sheshilmek
Ákimdiktiń habarlaýynsha, bul sońǵy 8 jyl ishinde áleýmettik jaǵdaıdy jaqsartýǵa baǵyttalǵan qol qoıylyp otyrǵan alǵashqy qujat.
Memleket basshysy jaqynda kenshiler óńirine jasaǵan sapary barysynda temirtaýlyqtardyń turmysyn jaqsartýǵa baǵyttalǵan birqatar tapsyrmalar bergen bolatyn. Onyń ishinde jańa emhana, balalar baqshasyn, sporttyq saýyqtyrý keshenin salý týraly aıtyldy.
«Áleýmettik jaýapkershilik sheńberindegi atalǵan jumystarǵa jumsalatyn barlyq shyǵyndardy «AMT» óz moınyna alady. Qazirgi ýaqytta árbir nysan boıynsha jobalar ázirlengen. Barlyq nysandar jańa zaman talaptaryna saı úlgide salynatyn bolady», - delingen habarlama.
Erlan Qoshanov ınvestordyń bolashaqta salynatyn emhana nysanynyń qurylysyn júrgizip qana qoımaı, ony jańa zamanǵa saı jabdyqpen qamtamasyz etetinin atap ótti.
«Memleket basshysynyń tapsyrmasy negizinde 20 myń adamǵa arnalǵan emhana salynady. Eń bastysy bul nysan aldaǵy ýaqytta qaladaǵy medıtsınalyq mekemeler boıynsha qajettilikti tolyqtaı sheshedi. Al 320 orynǵa arnalǵan balabaqshanyń salynýy Temirtaý qalasyna oblysta birinshi bolyp tolyqqandy mektepke deıingi sapaly tárbıe berýge aýysýǵa múmkindik jasaıtyn bolady. Atalǵan máseleler Elbasymyzdyń Joldaýynda aıtylǵan bolatyn. Bir sózben aıtqanda, balalardy balabaqshaǵa 3 jastan bastap emes, 1 jastan bastap qabyldaýǵa múmkindik týatyn bolady», - dep tolyqtyrdy óńir basshysy.
Emhana men balabaqshadan ózge Elbasy tapsyrmasy boınysha qalada jańa zamanǵa saı dene shynyqtyrý jáne saýyqtyrý kesheni salynatyn bolady. Sporttyq nysan 320 orynǵa arnalǵan. Atalǵan nysan 30 myń turǵyny bar yqsham aýdannyń janynan boı kóteretin bolady.
Óz kezeginde Paramjıt Kalon atalǵan áleýmettik mańyzy bar nysandardyń qarqyndy túrde salynatynyn atap ótti.
«Barlyq aıtylǵan nysandardy biz belgilengen merzimde salýǵa kúsh salatyn bolamyz. Qurylys jumystary barynsha jyldam júrgiziletin bolady. Qurylys jumystary aıaqtalǵan soń biz atalǵan nysandardy Prezıdentke kórsetetin bolamyz» - dedi Paramjıt Kalon.
Sonymen qatar Temirtaý qalasynda sapaly jylý berýdi qamtamasyz etýge baǵyttalǵan sharalar qolǵa alynýda. Elbasy 2-JES modernızatsııalap, 7 qazandyqty salýdy talap etken bolatyn. Qazirgi ýaqytta barlyq máseleler sheshilip, jobalyq smetalyq qujattar ázirlenip jatyr. Kelesi jyly atalǵan nysannyń qurylysy bastalatyn bolady.
Eske sala ketsek, qyrkúıek aıyndaǵy Elbasynyń Qaraǵandyǵa sapary barysynda Qazaqstan Prezıdenti turǵyndarǵa jaǵdaı jasaý jáne olardyń ál-aýqatyn jaqsartý úshin kásiporyndardyń áleýmettik jaýapkershiligin arttyrý qajettigi jóninde aıtqan bolatyn.
