Telegram Reseı naryǵyndaǵy jumysyn jalǵastyra beredi - Pavel Dýrov

ASTANA.KAZINFORM - Servıstiń negizin qalaýshy Pavel Dýrov birqatar arnalarda paıda bolǵan Telegram Reseı naryǵynan ketýi múmkin degen qaýesetti joqqa shyǵardy, dep habarlaıdy Kazinform tilshisi.

Kásipker Telegram-nyń Reseı naryǵynan ketýi týraly aqparat jalǵan ekenin málimdedi. Mundaı habarlamalardy Telegram arnalary ótken aptada taratty, sodan keıin messendjerdegi osyndaı jazbalardyń astynda arnaıy belgi paıda boldy.

Dýrov platforma týraly jalǵan aqparatty taratý servıske degen senimge nuqsan keltiretin maqsatty naýqannyń bir bóligi bolýy múmkin dep boljady.

– Bastapqyda satıralyq basylymda ázil retinde jarııalanǵan bul jańalyqty ázil-ospaqsyz, aıtarlyqtaı salmaqty arnalar tez arada qaıta basyp shyǵara bastady. Tipti Telegram arnalaryndaǵy mundaı jazbalardyń astyna teriske shyǵarý belgisin qoıýǵa týra keldi, - dep jazdy ol Telegram arnasynda.

Sondaı-aq ol messendjerde qoldanýshylar «faktchekıng» - jalǵan aqparatty joqqa shyǵaratyn belgiler dep ataǵan jańa fýnktsııanyń engizilgenin rastady.

Aıta keteıik, 2024 jyldyń tamyzynda Pavel Dýrov Parıjde ustalyp, tórt kún qamaýda bolyp, sotqa kelgen.

Dýrov qamaýǵa alynǵannan keıingi alǵashqy málimdemesinde BAQ-tyń Telegram-taǵy beınesin «múldem jalǵan» dep baǵalady.