Telegram-nyń Qazaqstanǵa jaýapty keńsesi Astanada ashylatyn boldy
ASTANA. KAZINFORM – Senattyń jalpy otyrysynda Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Telegram-nyń Qazaqstanǵa jaýapty keńsesi qaı qalada ashylatynyn aıtty.
«Biz Astana halyqaralyq qarjy ortalyǵynyń bazasynda Telegram-nyń keńsesin ashyp jatyrmyz. Kontentti moderatsııalaýǵa jaýapty naqty adam anyqtalady. Eger zorlyq-zombylyqqa shaqyrý nemese esirtkiniń zańsyz aınalymymen baılanysty zań buzý faktileri tirkelse, Telegram bizdiń ótinishterimizdi jyldam qarap, arnalardy buǵattap, joıýǵa kómektesedi», - dedi mınıstr.
Buǵan deıin Telegram Qazaqstandaǵy ókilin taǵaıyndap, keńsesin ashatyny habarlanǵan.
Biraq ol keńseniń qaı qalada bolatyny naqty aıtylmaǵan edi.
«Biz sondaı-aq Telegram platformasymen zańsyz kontentti jedel joıý jáne destrýktıvti arnalardy buǵattaý boıynsha belsendi túrde yntymaqtastyq ornatyp jatyrmyz. Bizdiń zańnamaǵa sáıkes, endi Telegram, WhatsApp jáne TikTok sııaqty ınternet-platformalar Qazaqstanda óz ókilin taǵaıyndaýǵa mindetti. Telegram-men olardyń ókilin taǵaıyndaý jáne keńse ashý týraly kelisimge qol jetkizildi — bul kontentti baqylaýdy arttyrýǵa baǵyttalǵan mańyzdy qadam», — degen Jaslan Madıev.
Osyǵan deıin Jaslan Mádıev 2027 jylǵa deıin 3 myńnan astam aýylǵa optıkalyq ınternet jetkiziletinin habarlady. Sonyń ishinde 1 400-den astam aýylǵa mobıldi ınternet te tartylady. Baılanys operatorlarynyń lıtsenzııalyq mindettemelerinde bul aýyldardy ınternetpen qamtamasyz etý eskeriledi.
