Telefon alaıaqtary Ulttyq banktiń atyn jamylyp, áreket ete bastady

NUR-SULTAN. QazAqparat - Telefon alaıaqtary ózderin Ulttyq banktiń nemese «QR Bankteri qaýymdastyǵynyń» qyzmetkeri retinde tanystyryp, áreket ete bastaǵan. Bul jaıynda Ulttyq bank eskertedi, dep habarlaıdy QazAqparat.

Shyn máninde alaıaqtar derbes derekterdi alý, kredıt rásimdeýge kóndirý jáne derbes derekterdi jarııalatý arqyly bank shottarynan aqsha jymqyrý maqsatyn kózdeıdi.

Osyǵan baılanysty Qazaqstan Ulttyq banki aqsha jiberý, derbes derekterdi berý, mobıldik qosymshalardy ornatý sekildi ótinishterden turatyn, ásirese jalǵan kredıtterdi rásimdeýge qatysty qońyraýlardy elemeýge keńes beredi.

Kóp jaǵdaıda telefon arqyly aıtylatyn mundaı áńgimeler uıymdasqan alaıaqtyq toptardyń áreketterin kórsetedi.

Qazaqstan Ulttyq bankiniń nemese «QR Bankteri qaýymdastyǵynyń» atynan dep habarlasqan kúdikti qońyraý nemese hat alǵan jaǵdaıda áńgimeni úzip, quqyq qorǵaý organdaryna júgingen jón.

Ulttyq banktiń aqparattyq qaýipsizdik jónindegi mamandarynyń usynymy

1. Eshkimge eshqandaı syltaýmen: bank kartasynyń nómirin, qoldanylý merzimin, artqy jaǵyndaǵy úsh tańbaly qupııa kodty, bankıngke kirý logınderi men parolderin, banktiń sms-kodtaryn, ózi jáne jaqyndary týraly jeke aqparatty bermeýge; uıaly qosymshalardy ornatpaýǵa jáne telefonmen sóılesý barysynda alynǵan nusqaýlar boıynsha qarajat aýdarmaýǵa mindetti.
2. «Bank qyzmetkerinen» messendjerge qońyraý kelip túsken kezde áńgimeni aıaqtap, qarjy uıymynyń resmı call-center-ne qaıta qońyraý shalyńyz.
3. Eger olar sizge aqsha aýdarý nemese aýdarý týraly usynyspen qońyraý shalsa, resmı derekkózden suraý maqsatyn tekserý kerek, sondaı-aq mundaı tólem Sizge tıesili ekenin tekserý kerek.
4. Belgisiz nemese kúdikti saıttarda telefon nómirin kórsetpeńiz jáne negizgi kartamen tólem jasamańyz.
5. Esterińizge sala keteıik, Ulttyq Bank jeke tulǵalarǵa qyzmet kórsetýmen aınalyspaıdy jáne aqshalaı esep aıyrysýlardy nemese mámilelerdi júrgizbeıdi.
6. Keńes alý úshin 1477 qysqa nómiri boıynsha Ulttyq banktiń baılanys ortalyǵyna habarlasýǵa bolady.