Tele2 jáne Altel uıaly baılanys operatoryn satyp alatyn kompanııa belgili boldy
ASTANA. KAZINFORM – «Qazaqtelekom» AQ men Qatar eliniń Power International Holding W.L.L. kompanııasy «MT-S» satyp alý sharttaryn aıqyndaıtyn qaǵıdattar týraly kelisimge qol qoıdy. Bul týraly «Qazaqtelekom» AQ-nyń Kommýnıkatsııalar departamenti habarlaıdy.
Qazaqstannyń iri telekommýnıkatsııalyq operatory «Qazaqtelekom» óziniń mobıldi aktıvteriniń biri – «Mobaıl Telekom-Servıs» JShS (Tele2/ALTEL brendteri) Taıaý Shyǵystyń jetekshi konglomeraty – qatarlyq Power International Holding-ke satýdy kózdep otyr. Qaǵıdattar týraly úsh jaqty kelisimge («Samuryq-Qazyna» AQ) búgin taraptar Qazaqstan Prezıdentiniń Qatar eline resmı sapary sheńberinde qol qoıyldy.
«Kelissózderdi jaqynda ǵana bastadyq, árıne, búgin Power International Holding kompanııasymen aldyn ala kelisimge keldik. Adaǵy ýaqytta satý-satyp alýdyń barlyq shartty men rásimderin talqylap, bekitý qajet. Sondyqtan naqty san, mámile somasy týraly aıtýǵa áli erte. Biz strategııalyq ınvestor retinde Pih sııaqty bedeldi jáne turaqty kompanııanyń nıet bildirgenine rızamyz, sebebi ol Qazaqstanda tanymal kompanııa. Elimizde holdıngtiń kóptegen jobasy bar ári olar aıtarlyqtaı tabysty», - dedi «Qazaqtelekom» AQ basqarma tóraǵasy Qýanyshbek Esekeev.
Power International Holding – bul ekonomıkanyń túrli sektorlaryn qamtıtyn Qatar konglomeraty. Kompanııada 65 myńǵa jýyq qyzmetker jumys isteıdi, álem boıynsha 1000-ǵa jýyq túrli jobalar iske asyrylýda. Máselen, 2022 jyldyń qazan aıynda Qatar Ámiriniń Qazaqstanǵa resmı sapary aıasynda holdıng Astanada quny 300 mıllıon dollarǵa jýyq iri halyqaralyq medıtsınalyq keshen salý týraly memorandýmǵa qol qoıǵan bolatyn.
«Biz Qazaqstanda uıaly baılanys operatoryn satyp alý týraly kelisimge qol qoıǵanymyzǵa ári ınvestıtsııalyq ahýaly óte qolaıly jáne iskerlik orta damyǵan sizdiń elińizde Pih bıznesin keńeıtip jatqanymyzǵa óte qýanyshtymyz» - dedi Power International Holding W. L. L. tóraǵasy Muhammed Mýtaz Ál-Haııat.
Eske sala keteıik, «Qazaqtelekom» AQ tobyna kiretin operatorlardyń birin satý týraly áńgime kópten beri báseńsigen emes. Degenmen buǵan qatysty naqty sheshim osy kúnge deıin aıtylmady. Bıyl 20 qańtarda ekonomıkany jańǵyrtý máseleleri jónindegi memlekettik komıssııanyń otyrysynda «Mobaıl Telekom-Servıs» JShS satý týraly sheshim qabyldanǵan bolatyn ári búgin Qatarda «Qazaqtelekom», «Samuryq-Qazyna» jáne Power International Holding qol qoıǵan kelisim sheńberinde «MT-S» 100% úlesin satyp alýdyń negizgi sharttary týraly ýaǵdalasty.
Aıta ketsek, 2019 jyly «Qazaqtelekom» «MT-S» -tyń 100% úlesin ıelendi. Búginde ol Qazaqstandaǵy eń iri uıaly baılanys operatory, onyń telekom-qyzmetteri men tsıfrlyq servısterin 7 mıllıonǵa jýyq adam paıdalanady. Kompanııa konsortsıýmǵa qatysýshylardyń biri.
