Tegin 10 sotyq jer alý: Qansha adam kezekte tur

ASTANA. KAZINFORM – Qazir jeke turǵyn úı salý úshin tegin 10 sotyq jer alýǵa 3,9 mln qazaqstandyq kezekte tur. Óńirler arasynda alǵashqy úshtikke Almaty oblysy, Túrkistan oblysy jáne Shymkent qalasy kiredi. Tegin jer alý týraly málimetti tolyǵyraq «Azamattarǵa arnalǵan úkimet» memlekettik korporatsııasy usynyp otyr. 

Memlekettik korporatsııanyń málimetine sáıkes, ótken jyly tegin 10 sotyq jerdi 8 805 otandasymyz alǵan, al bıyl 24 116 jer ýchaskesi beriledi. Byltyr elorda jáne Shymkent qalasynda jer ýchaskeleri berilmegen.

Kezekke egov.kz arqyly «Jyljymaıtyn múlik» odan ári «jer qatynastary» bólimine kirip onlaın suraý batyrmasyn basyp ótinish berýge bolady. Ótinish bergen kezde «kezekke qoıý» degendi, sodan keıin óńirdi tańdap, ETsQ kómegimen qol qoıý qajet.

Aıta keteıik, árbir kámeletke tolǵan qazaqstandyq óziniń menshiginde basqa jer ýchaskeleri, páterleri nemese úıleri bar-joǵyna qaramastan 10 sotyq tegin jerge ótinim bere alady.

Jerge kezektiń qalaı jyljyp jatqandyǵyn elektrondyq úkimet portalynda «jeke turǵyn úı qurylysyna (10 sotyq) jer ýchaskesin alý úshin qaraý nemese kezekke qoıý» qyzmetin tańdaý arqyly bile alasyz, ol úshin ETsQ (elektrondy tsıfrlyq qoltańba) qajet.

Sondaı-aq kezekti qaraý jyljymaıtyn múliktiń biryńǵaı memlekettik kadastrynyń kópshilik kadastrlyq kartasynda qoljetimdi. Ol úshin ETsQ nemese tolyq aty-jónin kórsetý qajet, biraq JSN arqyly kezekti tekserý múmkin emes.