Tegin dárimen qamtamasyz etý: Baılanys ortalyǵy iske qosyldy
Biryńǵaı dıstrıbıýtor dári-dármekterdi satyp alý boıynsha elimizdiń medıtsınalyq uıymdaryn tegin ambýlatorııalyq qamtamasyz etý úshin dárilik zattardyń túsýi suraqtary boıynsha baılanys ortalyǵyn iske qosty (7172) 23 50 98.
«SQ-Farmatsııa» basqarmasy tóraǵasynyń mindetin atqarýshy Sharııa Ismýhanovanyń aıtýynsha, barlyq qajettilik qazirdiń ózinde satyp alynǵan jáne emhanalarǵa jóneltilgenine qaramastan, halyqta dárilik qamtamsyz etýdegi úzilister týraly suraqtar áli de týyndap otyr.
«Bizdiń saıtta buryn jarııalanǵan telefondar boıynsha qazaqstandyqtarǵa ambýlatorııalyq dári-dármekpen qamtamasyz etý bóliminiń mamandary jaýap bergen. Biraq olar barlyq jumys ýaqyttaryn ár jaǵdaıdy anyqtaýǵa arnaı almaıtyn. Sondyqtan baılanys ortalyǵyn iske qosý týraly sheshim qabyldandy, endi operator halyqtyń suraqtaryna ǵana jaýap berip, dári-dármekti jetkizýdegi ár úzilis jaǵdaıyn túsindirýmen aınalysady», - deıdi Sharııa Ismýhanova.
«SQ-Farmatsııa» tóraǵasynyń aıtýynsha, baılanys ortalyǵy ázirshe pılottyq tártipte jumys isteıdi. «Keıinirek, qazaqstandyqtardyń qolaılylyǵy úshin, respýblıka boıynsha barlyq abonentterge biryńǵaı qysqa nómirdi iske qosý josparlanýda», - dedi ol.
Eske salaıyq, 2018 jyldyń 1 toqsanynda elimiz boıynsha barlyq 404 medıtsınalyq uıymǵa tegin ambýlatorııalyq dárilik qamtamasyz etý úshin 22,3 mlrd teńge somaǵa dári-dármek jóneltildi.
Aǵymdyq sáttegi jaǵdaı boıynsha qazaqstandyqtardy ambýlatorııalyq dárilik qamtamasyz etý úshin tizimdegi 494 ataýdan dárilik zattar men medıtsınalyq maqsattaǵy buıymdardyń 430 ataýy satyp alyndy. Tutastaı alǵanda, Biryńǵaı dıstrıbıýtordyń tizimi boıynsha ambýlatorııalyq jáne statsıonarlyq dárilik qamtamasyz etýge arnalǵan 1040 ataýy satyp alynǵan, ol jalpy qajettiliktiń 95%-yn quraıdy. Satyp alynbaǵan preparattar boıynsha tender jarııalanyp, ótinimderi bar konvertterdi ashý 28 naýryzda ótkizildi, sáýirde qorytyndysy shyǵarylady.
