Tegeranda Raısıdi jerleý rásimi bastaldy
ASTANA. KAZINFORM – Sársenbi kúni Iran astanasynda Iran prezıdenti Ibrahım Raısı, Syrtqy ister mınıstri Hoseın Amır-Abdollahııan jáne tikushaq apatynan qaza bolǵandardy jerleý rásimi bastaldy.
Negizgi jerleý rásimi búgin tańerteń Tegeran ýnıversıtetiniń janynda bastaldy. Irannyń rýhanı kósemi, 85 jastaǵy aıatolla Alı Hameneı Tegeran ýnıversıtetinde marqum prezıdent Raısıdiń janazasyn shyǵaryp, jeksenbi kúngi apatta qaza tapqan Raısı men basqa da ırandyq sheneýnikterge duǵa oqydy. Janazaǵa Iran prezıdentiniń mindetin atqarýshy Muhammed Mohber jáne basqa da resmı tulǵalar qatysty.
Marqumdardyń tabyttaryna Iran týy tigilgen, al Raısıdiń tabytynda onyń Muhammed paıǵambardan tikeleı shyqqanyn bildiretin qara taqııa bar. Tegeran ýnıversıteti men onyń mańaıynda kóptegen adam Raısıdiń sýretterin ustady. Alańnyń aınalasynan marqum prezıdentti madaqtaǵan transparanttardy kórýge bolady.
Sheteldik joǵary laýazymdy tulǵalar qatysatyn sherýler ýnıversıtet janynan bastalyp, ortalyq Engelab (Revolıýtsııa) alańyna qaraı bet aldy. Sherý odan keıin Engelab alańynan tabyttardy prezıdent Raısı ótkende sóz sóılegen shamamen 5 shaqyrym jerde ornalasqan Bostandyq alańyna aparady.
Jerleý rásimine Irannyń áskerılendirilgen Islam revolıýtsııasy Saqshylar korpýsynyń joǵary laýazymdy jetekshileri, sondaı-aq HAMAS basshysy Ismaıl Hanııa de qatysýda.
«Men Palestına halqy atynan, Gazadaǵy qarsylasý toptary atynan kóńil aıtý úshin keldim», - dedi Hanııa jınalǵandarǵa.
Hanııa sonymen birge Ramazan aıynda Raısımen Tegeranda kezdeskenin, sol kezde prezıdenttiń Palestına máselesi musylman álemindegi ózekti bolyp qalatynyn aıtqanyn baıandap berdi.
Raısıdi jerleý rásimine Túrkııa Syrtqy ister mınıstri Hakan Fıdan, Irak premer-mınıstri Muhammed Shıa as-Sýdanı, Pákistan premer-mınıstri Shehbaz Sharıf, Úndistan vıtse-prezıdenti Djagdıp Dhanhar, Reseı Memlekettik Dýmasynyń spıkeri Vıacheslav Volodın, Aýǵanstannan kelgen Talıban ókilderi, sonyń ishinde Syrtqy ister mınıstri Amır Han Mýtakkı bar.
Irannyń búkil aımaqtaǵy odaqtastarynan, sonyń ishinde Sırııa men Lıvandaǵy «Hezbolla» tobynan da kóńil aıtý habarlamalary keldi.
Bir kún buryn ushaq apaty bolǵan Irannyń Shyǵys Ázerbaıjan provıntsııasynyń ákimshilik ortalyǵy Tebrız qalasynda jerleý rásimi ótti. Azattyq alańynyń aınalasyndaǵy kósheler qorshaýǵa alynyp, qaýipsizdik sharalary kúsheıtilgeni habarlanǵan, óıtkeni onda myńdaǵan aza tutýshy jınalýda.
Raısıdi eske alý rásimine saǵat 16:00 (Astana ýaqytymen 17:30) shamasynda sheteldik joǵary ókiletti tulǵalar qatysady dep kútilýde. Keshke Raısıdiń súıegi jerleý úshin týǵan qalasy Meshhedke jetkiziledi.
Jerleý rásimine Qazaqstannan Májilis spıkeri Erlan Qoshanov qatysady. Mundaı buıryqty Memleket basshysy Qasym-Jomart Toqaev berdi. Iran prezıdentiniń jerleý rásimi 23 mamyr kúni keshke Meshhedtegi ımam Reza kesenesinde ótedi. Onda Syrtqy ister mınıstri Hoseın Amır Abdollahııan, Shyǵys Ázerbaıjan provıntsııasynyń gýbernatory Malık Rahmetı jáne aıatolla Tebrız Alı Hashım de jerlenedi.
