Tech Orda 2024: tegin IT-bilim alýǵa ótinim qabyldanyp jatyr
ASTANA. KAZINFORM – Tsıfrlyq damý mınıstrligi Tech Orda baǵdarlamasynyń jańa legine qatysý úshin jeke tulǵalardan ótinim qabyldanyp jatqanyn habarlady. Baǵdarlama Qazaqstannyń 18 ben 45 jas aralyǵyndaǵy barlyq azamatyna ІT-mamandyqtardy tegin ıgerý múmkindigin usynady.
Áleýetti stýdentterdiń ótinimderin qabyldaý 31 shildege deıin astanahub.com platformasynda júrgiziledi.
Astana Hub bazasynda QR TsDIAÓM bastamasy aıasynda iske asyrylyp jatqan Tech Orda baǵdarlamasy aqparattyq tehnologııalar salasyndaǵy adamı kapıtaldyń damýyna baǵyttalǵan. Ol veb-baǵdarlama ázirleý, 3D-dızaın men 3D AR/VR qosymshalar, baǵdarlamalyq qamtamasyz etý, kıberqaýipsizdik pen IoT, jasandy ıntellekt pen algorıtmderi, mobıldi qosymshalar jasaýdy qosa alǵanda, Big Data jáne GameDev salalary sekildi basym sektorlardyń barlyq spektrin qamtıdy.
«Tech Orda iske qosylǵannan beri jaqsy nátıjelerge qol jetkizdi. Baǵdarlamanyń 2022 jáne 2023 jyldardaǵy nátıjelerine qarap, onyń bilikti kadrlardy daıarlaý jáne elimizde IT boıynsha bilim berýdi damytýǵa qosyp jatqan súbeli úlesin baıqaýǵa bolady. Búginde 91 mektep 6251 stýdentti oqytty. Baǵdarlamaǵa tek úlken shahar turǵyndary ǵana emes, óńirlerde turatyn adamdar da belsendi qatysýda – IT-mektepterdiń shamamen 40%-y jáne stýdentterdiń 46%-y ártúrli aımaqtardan. Baǵdarlama jetistigin jumysqa ornalasýdyń joǵary kórsetkishteri de rastap otyr: túlekterdiń 88%-y jumysqa ornalasyp, olardyń ortasha jalaqysy shamamen 600 myń teńgeni qurady», – dedi Jaslan Mádıev, QR Tsıfrlyq damý jáne aeroǵarysh ónerkásibi mınıstri.
Túlekter Kaspi.kz, Halyk Bank, KPMG, Ernst&Young, Teńizshevroıl, QazMunaıGaz, Freedom Finance, Kcell, Air Astana, Kolesa Group sııaqty iri kompanııalardy qosa alǵanda, 1079 uıymnan jumys tapty.
«Bıyl baǵdarlamaǵa qatysýǵa nıet bildirgen 131 jeke IT-mekteptiń 79-y akkredıtteýden ótip, 178 túrli kýrs usyndy. Oqytý memlekettik, orys jáne aǵylshyn tilderinde júrgizilse, uzaqtyǵy tańdalǵan kýrsqa baılanysty 6 aıdan bastalady. Formaty – ıkemdi, ıaǵnı onlaın, oflaın jáne aralas. Bul stýdentter úshin jańa múmkindikter ashyp, mamandyqty ıgerýdiń neǵurlym yńǵaıly tásilin tańdaýǵa múmkindik beredi», – dedi Ázız Tileýmuratov, Astana Hub basqarýshy dırektory.
Memleket basshysy Qazaqstan halqyna Joldaýynda keminde 100 myń IT-maman daıarlaýdy tapsyra otyryp, jas, bilimdi ári yntaly kadrlardy qalyptastyrý qajetin atap ótti. Tapsyrmaǵa sáıkes QR TsDIAÓM Astana Hub halyqaralyq tehnoparkimen birlesip, 2021 jyly 20 myń IT-kadr daıarlaýdy kózdeıtin Tech Orda baǵdarlamasyn iske qosty. Aıshyqty bastama sheńberinde memleket qoldaýymen ár stýdentke 600 myń teńge bóle otyryp, jyl saıyn 3 myńnan astam IT-maman oqytý josparlandy.
Tech Orda baǵdarlamasyna qosylýdy nıet etkender úshin astanahub.com portalynda mektepter men kýrstardyń tolyq tizimi jazylǵan ІT-mektepter kórmesi bar. Qosymsha aqparatty tańdalǵan ІT-mektepke nemese 1818 telefon nómirine habarlasyp bilýge bolady.
