Tazy qazaq brendi bolyp resmı tirkele me – odaq basshysy jaýap berdi
ASTANA. KAZINFORM – Búgin Astanada ıtterdiń halyqaralyq kórmesi ótip jatyr. Ondaǵy basty maqsat – tazyny álemdik deńgeıde moıyndatý. Elimizde tazy, tóbet ıt tuqymyn saqtap, ony kóbeıtý aıasynda qandaı is-sharalar qolǵa alynyp jatyr? Osy saýalǵa jaýap izdep Kazinform agenttiginiń tilshisi Qazaqstan kınologtar odaǵynyń prezıdenti Baýyrjan Serikqalımen arnaıy sóılesken edi.
«Aldymen óńiraralyq irikteý boldy, ol jerde tazy standartyna sáıkes bolýy talap. Solardyń ishinen halyqaralyq komıssııaǵa usynyp, kórsetý úshin ártúrli jastaǵy jáne tústegi 100-den astam tazyny tańdap aldyq. Búgingi kórme óte mańyzdy, sebebi osy sharanyń negizinde halyqaralyq kınologııa federatsııasy tazynyń taǵdyryn sheshetin sheshim qabyldaıdy, ıaǵnı tazyny qazaqy ıt dep taný. Sondaı-aq, búgingi kórmede halyqaralyq komıssııa tazyny óz kózimen kórip, tekseredi, óıtkeni qujattama bir bólek, al kózben kýá bolý basqa», - dedi Baýyrjan Serikqalı agenttik tilshisine suhbat berip.
Onyń aıtýynsha, halyqaralyq komıssııa tazynyń qazaq jerinde paıda bolyp, órbigenine kózýi jetýi tıis, sonda ǵana ony «Kazakh Tazy» brendi deýge bolady.
«Sonymen qatar komıssııa músheleri ıtti asyraý, baptaýdy óz kózimen kórgisi keledi, sol úshin elimizge arnaıy kelip otyr. Komıssııanyń qandaı sheshim qabyldaıtyny ázirge belgisiz, biraq, jyldyń aıaǵyna deıin bir sheshim shyǵarady dep úmittenip otyrmyz. Іrikteý kezeńine tazy ustaýshylar barlyq óńirden qatysty, ókinishke qaraı sý tasqynyna baılanysty keıbir óńir qalys qaldy. Jalpy tazy, tóbetti saqtap, odan ári damytýǵa Prezıdenttiń tapsyrmasy úlken dem berdi, bul iske memlekettik jáne jergilikti organdar atsalysyp jatyr. Bolashaqta ulttyq tazy ortalyǵy bolady dep otyrmyz», - deıdi ol.
Byltyr tamyzda Qazaqstan halyqaralyq kınologııa federatsııasynyń múshesi boldy.
«Ótken jyly tamyzda Jeneva qalasynda halyqaralyq federatsııa bizdi resmı moıyndady. Araǵa az ýaqyt salyp, ózimizdiń tazyny álemge tanytyp, moıyndataıyq degen oımen ótinim berdik. Sonyń negizinde bizdiń elge arnaıy komıssııa taǵaıyndaldy. Sondaı-aq, bizdiń tazylardyń qatysýymen arnaıy ańshylyq synaq jasaý oıymyz bar. Óıtkeni, tazy men ańshylyq egiz sóz. Odan bólek, ıtterdiń jarysyn uıymdastyryp, damytý josparda bar. Sol sııaqty elimizdegi ár tazynyń jeke kýáligi bolǵanyn qalap otyrmyz. Odan bólek, bizde tóbet bar, ony da moıyndatý kerek, qazir ǵalymdar aınalysyp jatyr. Keıin tóbetti de halyqaralyq deńgeıde moıyndaý boıynsha ótinish beremiz», - deıdi odaq basshysy.
Qazir elimizde shamamen 3-3,5 myń tazy bar.
«Qazaqstanda qansha tazy bar degen saýal jıi qoıylady. Aldymen aıtarym, elimizde bizdiń odaqtan bólek basqa da tazymen aınalysatyn uıymdar bar. Olardyń óz esebi bar, ony atap ótý kerek. Bizdiń esep boıynsha el aýmaǵynda 3000-3500 tazy tirkelgen. Biraq, qujatsyz júrgen qanshama tazy bar, sol úshin qazir biz esep júrgizip jatyrmyz. Eger tazy standartyna saı bolsa, biz ony tirkep, sáıkesinshe qujat beremiz. Tazynyń naqty sany rettelgen soń, 2-3 ese ósedi dep oılaımyn», - dedi B. Serikqalı.
