Tájikstanda alyp muz bólindi
ASTANA.KAZINFORM - Tájikstannyń Tájikabad aýdanyndaǵy muzdyqtan alyp muz kesegi bólinip qaldy, dep habarlaıdy Kazinform agenttiginiń menshikti tilshisi.
-2025 jyldyń 25 qazanynda Tájikabad aýdanyndaǵy Dehdal muzdyǵynyń úlken bóligi bólinip qaldy. Muz massasynyń aıtarlyqtaı bóligi (uzyndyǵy 1500 metrge deıin jáne bıiktigi 50 metrge deıin) tómen qaraı jyljydy. Bul qubylysqa atmosferalyq temperatýranyń kóterilýi men uzaq ýaqyt jaýyn-shashynnyń bolmaýy áser etti. Bul muzdyqtyń qarqyndy erýine jáne sý balansynyń ózgerýine yqpal etti,- deıdi Tájikstan gıdrometeorologııa agenttigi.
Tájikstan bıliginiń málimetinshe, muzdyń erýinen adam shyǵyny bolǵan joq jáne ol eshteńege zalalyn tıgizgen joq. Alaıda, sarapshylardyń pikirinshe, aldaǵy ýaqytta qatty jaýyn-shashyn bolǵan jaǵdaıda keıbir eldi mekenderdi sý basý qaýpi joǵary.
Tájikstanda 14 myńnan astam muzdyq bar. Ortalyq Azııadaǵy iri jáne kishi muzdyqtar negizgi sý kózi sanalady, biraq sońǵy 30 jyldaǵy jahandyq jylynýǵa baılanysty 1000-nan astam muzdyq tolyǵymen joǵalyp ketti.
Osyǵan deıin 2050 jylǵa qaraı Tájikstan muzdyqtarynyń 20%-y joıylýy múmkin ekeni týraly jazdyq.