Tájikstan prezıdenti Qyrǵyzstanǵa saparlaıdy

ASTANA. KAZINFORM — 12 naýryzda Tájikstan prezıdenti Emomalı Rahmon Qyrǵyz Respýblıkasyna memlekettik saparmen barady.

Qyrǵyz Respýblıkasy Prezıdenti Ákimshiliginiń Syrtqy saıasat bóliminiń meńgerýshisi Muratbek Azymbakıevtiń aqparaty boıynsha osy sapar aıasynda onyń mártebesine sáıkes saltanatty is-sharalar, sondaı-aq Qyrǵyz Respýblıkasynyń Prezıdenti Sadyr Japarov, Qyrǵyz Respýblıkasy Jogorký Keneshiniń Tóraǵasy Nurlanbek Turǵynbekýýly jáne Qyrǵyz Respýblıkasy Mınıstrler kabınetiniń tóraǵasy Adylbek Qasymalıevpen ekijaqty kezdesýler josparlanǵan.

— Qyrǵyz Respýblıkasynyń Prezıdenti Sadyr Japarov pen Tájikstan Respýblıkasynyń Prezıdenti Emomalı Rahmonnyń Birlesken málimdemesin qabyldaý, Qyrǵyz Respýblıkasy men Tájikstan Respýblıkasy arasynda Memlekettik shekara týraly kelisimge jáne basqa da ekijaqty qujattarǵa qol qoıý josparlanyp otyr, — dep atap ótti M.Azymbakıev.

Buǵan deıin Qyrǵyzstan men Tájikstan shekara máselesin tolyq rettegenin jazǵan bolatynbyz. 

Jogorký Kenesh komıtetteriniń birlesken otyrysynda Qyrǵyzstan men Tájikstan arasyndaǵy memlekettik shekara týraly úsh kelisim maquldandy.