Tájikstanda Qazaqstan medıtsınasy kúnderi bastaldy
Eki kúndik sharaǵa elimizdiń Densaýlyq saqtaý vıtse-mınıstri Oljas Ábishev bastaǵan 30-dan astam delegat qatysýda. Olardyń qatarynda otandyq jetekshi medıtsınalyq uıymdar men klınıkalardyń birinshi basshylary, sanatorlyq-kýrorttyq uıymdardyń qyzmetkerleri, farmkompanııalar, medıtsınalyq ýnıversıtet rektorlary bar.
Eki memlekettiń densaýlyq salasyndaǵy yntymaqtastyqty nyǵaıtýǵa baǵyttalǵan sharanyń birinshi kúni forým men qazaqstandyq medıtsına jetistikteriniń kórmesi ótedi.
Forým barysynda Qazaqstandaǵy medıtsına salasyndaǵy reformalar, praktıkalyq medıtsınada qoldanylatyn ınnovatsııalar men ozyq tehnologııalar, otandyq medıtsınanyń múmkindikteri men jetistikteri baıandalatyn tanystyrylymdar bolady. Taraptar óz tájirıbelerimen, ınnovatsııalyq jáne tehnologııalyq jetistikterimen almasady. Dıalogtyq alańda medıtsınalyq týrızmdi damytý, ana men balanyń densaýlyǵyn qorǵaý, reprodýktıvti hırýrgııanyń jetistikteri, kardıologııa salasynda zamanaýı tehnologııalardy qoldaný, kardıohırýrgııalyq qyzmetti damytý jáne densaýlyq saqtaý salasyn tsıfrlandyrý jáne t.b. medıtsınadaǵy ózekti máseleler talqylanady.
Іs-sharanyń ekinshi kúni Dýshanbedegi jetekshi medıtsınalyq uıymdarda sheberlik synyptary men konsýltatsııalar ótkiziledi.
«Forýmǵa Pedıatrııa jáne balalar hırýrgııasy ǵylymı ortalyǵynyń Basqarma tóraıymy Rıza Boranbaeva, ortalyqtyń bilikti dárigeri Rústem Bıshmanov qatysýda. Ortalyq delegattary sapar barysynda keshe Respýblıkalyq onkologııalyq ǵylymı ortalyǵynda boldy. Kezdesý barysynda Pedıatrııa ortalyǵynyń basshysy R.Boranbaeva «Qazaqstandaǵy Pedıatrııa — múmkindikteri men keleshegi» taqyrybynda tanystyrylym jasap, Tájikstan onkologııalyq ortalyǵynyń qyzmetin kórdi«, - dep atap ótedi ortalyqtyń baspasóz qyzmetinen.
Sharanyń basty maqsaty — Tájikstan men Qazaqstan densaýlyq saqtaý júıeleri arasyndaǵy yntymaqtastyqty kúsheıtý, medıtsınalyq uıymdar arasyndaǵy áriptestikti nyǵaıtý, eki eldiń azamattaryna medıtsınalyq kómek kórsetýdiń qoljetimdiligi men sapasyn qamtamasyz etý jolynda tájirıbe men bilimmen, ınnovatsııalar men tehnologııalarmen almasý.