«Taza Qazaqstan». Jambylda 2,8 myń tonna qoqys shyǵaryldy
TARAZ. KAZINFORM — Jambyl oblysynda «Taza Qazaqstan» ekologııalyq aktsııasy jalǵasyp jatyr, dep habarlaıdy oblystyq ákimdiktiń baspasóz qyzmeti.
Osy rette, 21 sáýir kúni Jambyl oblysynda oblys turǵyndarynyń qatysýymen birqatar tazalyq aktsııasy ótkizildi.
Atap aıtqanda, Taraz qalasyndaǵy Mamyr saıabaǵy men «Aısha bıbi» men «Qarahan» kesenesiniń aýmaǵynda tazalyq aktsııasy uıymdastyrylyp, kesilgen, qýraǵan aǵashtar, qoqystar tazalandy. Sonymen qatar, aktsııa uıymdastyrylǵan oryndarǵa aǵashtar egildi.
— «Taza Qazaqstan» aktsııasy — bul jaı ǵana tazalyq jumystary emes, ózekti ekologııalyq máselelerdi sheshýge mol septigin tıgizetin aýqymdy joba. Aktsııa bastalǵaly beri oblysta kóptegen jumystar atqarylyp, tazalyq jumystary júıeli túrde júrgizilýde. Bul turǵyndar arasyndaǵy ekologııalyq mádenıetti, óskeleń urpaq arasyda tabıǵatqa degen súıispenshilikti qalyptastyrýǵa mol septigin tıgizýde. Biz qorshaǵan ortaǵa asa jaýapkershilikpen qaraýǵa tıistimiz, — dedi oblystyq jastar resýrstyq ortalyǵynyń dırektory A. Kadralıev.
«Taza Qazaqstan» ekologııalyq aktsııasy oblystyń barlyq aýdandarynda ótkizildi. Atap aıtqanda, Merki aýdany Merki taý shatqalynda, Qarataý, Jańatas qalalary men aýyldyq okrýgterde 28 is-shara uıymdastyryldy. Oǵan jalpy 2 myńǵa jýyq adam qatysty.
Aıta keteıik, oblys boıynsha naýryzdan aıynan bastalǵan kóktemgi eki aılyq abattandyrý jumystary aıasynda «Taza qala», «Taza kásip — taza aımaq», «Jasyl qala», «Bolashaqty birge otyrǵyzamyz» «Jer saǵaty» jáne t. b. aktsııalary ótkizilýde.
Jambyl oblysynda jyl basynan beri aktsııa aıasynda 350 shaqyrym kanaldar men aryq júıeleri, 48 myń turǵyn úı aýlalary men 1,3 myń shaqyrym kósheler tazalanyp, 2,8 myń tonna qoqys shyǵaryldy. Bıyl egiletin 195 myń taldyń búginge 128 myńǵa jýyǵy otyrǵyzylyp, 2,4 myń aǵash sanıtarlyq butalandy. 60 tarıhı-mádenı eskertkish, 143 saıabaq pen skver aýmaqtary turaqty qoqystardan tazalanýda. Bul jumystarǵa 150 birlik tehnıka jumyldyrylǵan.
Buǵan deıin Prezıdenttiń keńesshisi – Baspasóz hatshysy Rýslan Jeldibaı «Taza Qazaqstan» aktsııasy halqymyz túgeldeı qatysatyn aýqymdy sharaǵa aınalǵanyn aıtqan edi.