«Taza Qazaqstan»: Pavlodarda 8 myń túp aǵash otyrǵyzyldy
PAVLODAR. KAZINFORM — Respýblıkalyq aktsııa aıasynda óńirdiń 50 myń turǵyny senbilikke belsene qatysty. Oblys boıynsha barlyǵy 10 myń tonna qoqys jınalyp, shyǵarylǵan.
«Taza Qazaqstan» aýqymdy jalpyulttyq ekoaktsııasy Pavlodarda da ótti. Oblys ortalyǵynda jappaı senbilik ótkizilip, júzdegen túp aǵash otyrǵyzyldy. Pavlodar qalasynyń ákimi Hasar Habylbekov oblys ortalyǵyn odan ári kógaldandyrý jospary bastalyp ketkenin habarlady. Bıyl Pavlodar qalasynyń aýmaǵynda 20 myńǵa jýyq kóshet otyrǵyzylady. Onyń teń jartysy «Jasyl beldeýge» egiledi. Sondaı-aq negizgi kóshelerdegi shirigen aǵashtar kezeń-kezeńimen aýystyrylady.
Byltyr avtomattandyrylǵan sýarý keshenderi ǵashyqtar skverinde jáne ortalyq skverde ornatyldy. Bıyl osyndaı júıeler ortalyq jaǵalaýda, Konstıtýtsııa skverinde, Máshhúr Júsip atyndaǵy ortalyq meshittiń aýlasynda jáne Qazqonaq tabıǵı eskertkishi aýmaǵynda paıda bolady.
Óńirlik aqparat jáne azamattyq damý basqarmasynyń dereginshe, ekologııalyq aktsııaǵa bul kúni 50 myń adam ún qosqan. Tazalyq jumystaryna 1200 tehnıka jumyldyrylyp, 10 myń tonna qoqys shyǵaryldy. Eldi mekenderde 8 myń aǵash kósheti men 5 myń buta otyrǵyzylǵan.
