Elimizde «Taza Qazaqstan» tujyrymdamasy bekitiledi
ASTANA. KAZINFORM – Elimizde 2024-2029 jyldarǵa arnalǵan «Taza Qazaqstan» ekologııalyq mádenıetin damytý tujyrymdamasy bekitiledi. Bul týraly QR Ekologııa jáne tabıǵı resýrstar vıtse-mınıstri Jomart Álıev OKQ alańynda ótken baspasóz máslıhatynda málim etti.
«Memleket basshysy QR Ekologııa jáne tabıǵı resýrstar mınıstrligine tıisti memlekettik organdarmen birlese otyryp belgilengen tártippen 2024-2029 jyldarǵa arnalǵan «Taza Qazaqstan» ekologııalyq mádenıetin damytý tujyrymdamasyn ázirleýdi jáne bekitýdi tapsyrdy. 15 qazan kúni bul kontseptsııany Úkimet maquldady, qazirgi kezde qujat bekitý satysynda tur», - dedi vıtse-mınıstr «Taza Qazaqstan» ekologııalyq mádenıetin damytý tujyrymdamasyn bekitý týraly baspasóz máslıhatynda.
Jomart Álıevtiń aıtýynsha, tujyrymdama áýeli «Ashyq NQA» portalyna ornalastyrylǵan. Osylaısha qoǵamdyq talqylaý úderisine jurtshylyqtyń tolyq qatysýyna múmkindik jasalǵan.
«Tujyrymdamanyń irgetasy bolyp joǵary ekologııalyq mádenıetti jáne jaýapkershilikti qalyptastyrý, ekologııalyq bilimdi arttyrý, sondaı-aq ekologııalyq saıasatty utymdy júrgizý sanalady. Bul iske elimizdiń barlyq turǵyny atsalysýy kerek. Tujyrymdama qazirgi jaǵdaıdy jáne halyqaralyq tájirıbeni taldaýdan bastap ony júzege asyrý jónindegi is-qımyl josparyna deıingi 7 bólimdi qamtıdy. Bul tujyrymdamanyń negizgi baǵyttary men tásilderin qurylymdyq turǵydan anyqtaýǵa múmkindik berdi», - dedi QR Ekologııa jáne tabıǵı resýrstar vıtse-mınıstri.
Atap óteıik, Qazaqstanda ekologııalyq mádenıetti damytý 2024-2029 jyldar kezeńinde mynadaı negizgi baǵyttar boıynsha iske asyrylady:
• ekologııalyq oılaý jáne minez-qulyq, sonyń ishinde yntalandyrý jáne olardy kótermeleý sharalary;
• ekologııalyq bilim;
• ekologııalyq bilim jáne aqparattyq nasıhat.
Árbir baǵyt boıynsha tujyrymdamany iske asyrý boıynsha qabyldanatyn sharalardyń tıimdiligin monıtorıngileýge jáne qajet bolǵan jaǵdaıda olardy túzetýge múmkindik beretin tıisti ındıkatorlar aıqyndaldy.
