Taza Qazaqstan: Baıanaýyldan 800 tonnadan astam qoqys shyǵaryldy

PAVLODAR. KAZINFORM - Eriktiler men stýdentter Baıanaýyl aýmaǵyn tazalaý jumystaryn jalǵastyrýda. «Taza Baıan – Taza júrek» eki kúndik aktsııasyna júzden astam adam qosyldy.

Tazalyq sharasyna stýdentter, eriktiler, jasyleldikter, «Jastar rýhy», dene shynyqtyrý jáne sport basqarmasynyń ókilderi, ulttyq saıabaq qyzmetkerleri qatysty. 

– Aktsııa kórikti jerlerdi qamtıdy. Eki kún boıy bizdiń komanda Toraıǵyr, Jasybaı jáne Sabyndykól kólderiniń jaǵasynda, Qońyr áýlıe úńgiriniń, Kempirtas jartasynyń janynda, qorymdar boıynda qoqys jınaıdy, – dep atap ótti Stýdentter alıansynyń tóraǵasy Dáýren Sháripov.

Qutqarýshylar men dárigerler aktsııaǵa qatysýshylarǵa sýdaǵy jáne qurlyqtaǵy qaýipsizdik erejeleri týraly eske saldy. Eriktiler eki kún ishinde bir jarym tonna qoqys jınaýdy josparlady. Alǵashqy kúni demalys oryndarynan 170 qap qoqys shyǵaryldy.
Eriktiler 15 maýsymnan bastap Baıanaýyldyń kıeli jáne mádenı aımaqtarynan 800 tonnadan astam qoqys shyǵarǵan.

Eske sala keteıik, «Taza Qazaqstan» ekologııalyq aktsııasy aıasynda Pavlodarda jastarǵa arnalǵan ekoklýb ashyldy.