Taza Qazaqstan: Astanada ekobýkkrossıng sóresi ashyldy
ASTANA. KAZINFORM – Astanadaǵy Ortalyqtandyrylǵan kitaphanalar júıesi erekshe is-sharany qolǵa aldy, dep jazdy elorda ákimdiginiń resmı saıty.
«Taza Qazaqstan» respýblıkalyq ekologııalyq aktsııasy aıasynda Astana qalasy ákimdiginiń «Ortalyqtandyrylǵan kitaphanalar júıesi» kommýnaldyq memlekettik mekemesi ekobýkkrossıng sóresin iske qosty. Mundaǵy basty maqsat – kitap arqyly ekologııalyq mádenıetti qalyptastyrý.
– Ekobýkkrossıng sóresi – bul kitaphana qyzmetkerleri men oqyrmandardy ortaq keńistikte biriktiredi, onda árkim kitapty qoqysqa tastaýdyń nemese paıdalanbaı saqtaýdyń ornyna basqa oqyrmanǵa bere alady, ıaǵnı bir-birimen kitap almasady, – dedi qalalyq «Ortalyqtandyrylǵan kitaphanalar júıesi» KMM dırektorynyń orynbasary Bekbolat Arystanbekov.
Bekbolat Arystanbekovtiń aıtýynsha, is-shara kópshilikke ekologııalyq bilim berý, halyq arasynda oqý mádenıetin qalyptastyrý, kitaphana qyzmetkerleri men oqyrmandaryn ekologııalyq qozǵalysqa tartýdy maqsat etedi.
– Ekobýkkrosıngke qoıylǵan basty taqyryptar elimizde mekendeıtin janýarlar túrlerine, Qazaqstannyń tabıǵatyna, qoryqtaryna, taýly aımaqtaryna arnalady. Kórmege ósimdikter álemi, balalarǵa arnalǵan ekologııalyq álippe syndy kitaptardy qoıdyq. Sondaı-aq kelýshiler kórmeden 20 oblystyń sulý tabıǵaty jaıly kitaptardy da taba alady. Bul kitaptardy alý úshin ár adam óziniń ekologııalyq baǵyttaǵy bir kitabyn ákelip, ornyna basqa kitapty alyp kete alady, – dedi ol.
Uıymdastyrýshylardyń aıtýynsha, ekobýkkrossıng – Astana kitaphanalary júıesiniń tabıǵatqa uqyppen qaraýǵa jáne qala turǵyndarynyń ekologııaǵa jaýapkershiligin qalyptastyrýǵa baǵyttalǵan kezekti mańyzdy qadam.
Aıta keteıik, bul is-shara jyl sońyna deıin bolady.