Taılandta qurylys kranynyń poıyz ústine qulaýy saldarynan mert bolǵandar sany 32-ge jetti

ASTANA. KAZINFORM – Taılandta qurylys kranynyń jolaýshylar poıyzynyń ústine qulaýy saldarynan mert bolǵandar sany 32-adamǵa jetti. Bul týraly Thai PBS telearnasyna silteme jasap Belta habarlady.

Taılandtyń Nakhonratchasıma provıntsııasynyń densaýlyq saqtaý basqarmasynyń málimetinshe, 14 qańtardyń keshine qaraı zardap shekkenderdiń jalpy sany 99 adamǵa jetken. Onyń ishinde 32 adam qaza tapqan, úsh adam habar-osharsyz ketken, qalǵandary ártúrli dárejede jaraqat alǵan.

Buǵan deıin 22 adamnyń qaza tapqany jáne 79 adamnyń jaralanǵany habarlanǵan edi. Aldyn ala derekterge sáıkes, oqıǵa bolǵan sátte poıyzda barlyǵy 195 jolaýshy bolǵan.

BBC dereginshe, apat 14 qańtar kúni tańerteń Taılandtyń soltústik-shyǵysyndaǵy Nakhonratchasıma provıntsııasynda bolǵan. Krannyń qulaýy saldarynan poıyz relsten shyǵyp, artynsha órt tutanǵan. Qazir oqıǵa ornynda qutqarý qyzmetteri jumys istep jatyr.

Koroldik bılik apattyń sebep-saldaryn anyqtaý úshin jan-jaqty ári muqııat tergeý júrgizýdi tapsyrdy. Qaıǵyly oqıǵa Taılandtaǵy kólik qaýipsizdigi máselesin qaıtadan kún tártibine shyǵardy.

Osyǵan deıin Taılandtyń soltústik-shyǵysynda qurylys krany qulap, jolaýshylar poıyzy relsten shyǵyp ketkeni týraly jazdyq.