Taıaý Shyǵysqa jol, óńir qaýipsizdigi — qazaq-ózbek mınıstrleri qandaı máselelerdi talqylady
HIÝA. KAZINFORM — Hıýa qalasynda Qazaqstan men Ózbekstan Syrtqy ister mınıstrleri keńesiniń alǵashqy otyrysy ótti, dep habarlaıdy mınıstrliktiń baspasóz qyzmeti.
Qazaqstan men Ózbekstan Syrtqy ister mınıstrleri keńesiniń alǵashqy otyrysynda taraptar saýda-ekonomıkalyq baılanystardy nyǵaıtý, taýar aınalymyn arttyrý jáne ónerkásip, aýyl sharýashylyǵy, kólik, logıstıka, qurylys salalarynda birlesken ınvestıtsııalyq jobalardy iske asyrý sharalary jóninde ýaǵdalasty.
Eki eldiń memleket basshylarynyń bastamasymen qurylǵan bul keńes —aradaǵy barlyq máseleni keshendi qaraýǵa múmkindik beretin túbegeıli jańa format.
Qazirgi ýaqytta Qazaqstan Ózbekstannyń 3 negizgi saýda seriktesiniń qataryna kiredi, eki el arasyndaǵy jyldyq taýar aınalymy 4 mlrd AQSh dollarynan asady. Memleket basshylarynyń tapsyrmalaryna sáıkes 2030 jylǵa deıin bul kórsetkishti 10 mlrd dollarǵa jetkizý jáne «Ortalyq Azııa» halyqaralyq ónerkásiptik kooperatsııa ortalyǵyn iske qosý josparlanýda.
Sonymen birge, qos tarap Termezdegi «AIRITOM» arnaıy ekonomıkalyq aımaǵynda Qazaqstan saýda pavılonynyń ashylýyn quptap, Aýǵanstanmen saýda qatynastaryn keńeıtý perspektıvalaryn atap ótti.
Búgingi kezdesýde óńiraralyq baılanystardy nyǵaıtýǵa erekshe kóńil bólindi. Delegattar kólik jáne logıstıka salasyndaǵy birlesken jobalardy júzege asyrý máselelerin talqylady. Transkaspıı halyqaralyq kólik dálizin damytýǵa basymdyq berilip, onyń Ortalyq Azııa elderiniń Taıaý Shyǵys, Ońtústik Azııa jáne Eýropa naryqtaryna shyǵýyna yqpal etetini aıtyldy. Júk tasymalyn ulǵaıtý jáne kólik ınfraqurylymyn jańǵyrtý boıynsha yntymaqtastyqty keńeıtýge daıyndyq rastaldy.
Ónerkásip vıtse-mınıstri Iran Sharhan ónerkásip salasynda eki el arasynda 78 nysan iske asyrylyp jatqanyn aıtty. Onyń ishinde ázirge 220 mıllıonǵa jýyq dollarǵa 12 nysan iske qosyldy.
— Osy jobalar boıynsha birneshe suraq, problemalyq máseleler talqylandy jáne birazynyń sheshimi tabyldy. Taǵy da atap ótetin másele — eki eldiń geologııa salasyn damytý boıynsha birneshe sheshimge keldik. Bul rette ónerkásiptik kooperatsııa bizge jaqsy nátıje ákelerine kúmánimiz joq. Qalǵan jobalar 2028-2030 jyldary tolyǵymen iske asyrylady. Mysaly, quny 160 mıllıon dollar bolatyn «Azııa prof metall» — Jambyl oblysyndaǵy úlken joba, ol 2028 jyly osy joba iske qosylady, — dedi Iran Sharhan.
Sý-energetıka salasynda da seriktestikti ózara múddeler negizinde damytý josparlary qarastyryldy. Osy baǵyttaǵy ózara is-qımyldyń tabysty mysaly — Qambar-Ata GES-1 qurylysy boıynsha úshjaqty jobany ilgeriletý bolmaq.
Mınıstrler mádenı-gýmanıtarlyq yntymaqtastyqtyń qazirgideı joǵary qarqynyn saqtaý qajettigin atap ótti. Ótken jyly Astanada ózbek aqyny Álisher Naýaıge eskertkish qoıylyp, Tashkent kúnderi tabysty ótken edi. Jaqyn kúnderi Almatyda «Lazgı. Jan men mahabbat bıi» spektakli men kórnekti sýretshi Oral Tańsyqbaevtyń kórmesi uıymdastyryldy.
Sondaı-aq, kezdesý qatysýshylary joǵary bilim salasyndaǵy yntymaqtastyqty keńeıtýge kelisti. Ońtústik Qazaqstan ýnıversıtetiniń Shyrshyq qalasyndaǵy fılıaly men Almatydaǵy Tashkent ırrıgatsııa jáne aýyl sharýashylyǵyn mehanıkalandyrý ınjenerleri ınstıtýtynyń tabysty jumysy atalyp ótti.
Týrızm salasyndaǵy yntymaqtastyqty tereńdetý, onyń ishinde eki eldiń mádenı murasyn nasıhattaıtyn birlesken jobalardy júzege asyrý máseleleri talqylandy.
Oǵan qosa, óńirlik jáne halyqaralyq kún tártibindegi ózekti máseleler boıynsha pikir almasyp, kópjaqty qurylymdar aıasynda yntymaqtastyqty nyǵaıtýǵa jáne bir-biriniń bastamalaryn ózara qoldaýǵa daıyndyǵyn bildirdi.
Mınıstrler Ortalyq Azııadaǵy óńirlik kooperatsııany damytýdyń jáne turaqtylyq pen ornyqty damýǵa birlesken kúsh-jigermen yqpal etýdiń mańyzdylyǵyn atap ótti. Bul turǵyda Ortalyq Azııa memleketteri basshylarynyń konsýltatıvtik kezdesýleri, Halyqaralyq Araldy qutqarý qory jáne «OA+» formattaryndaǵy yntymaqtastyqty jalǵastyrý qajettigi aıtyldy.
Sapar aıasynda syrtqy saıası vedomstvolarynyń basshylary Hıýanyń mádenı nysandary — ıÝNESKO-nyń Dúnıejúzilik muralar tizimine engen tarıhı ortalyǵy Ishan-qalany jáne Horezm turǵyn úı qurylysynyń dástúrli erekshelikterin beıneleıtin Nurolla baı saraıyn aralady.
Kelissózder qorytyndysy boıynsha Qazaqstan jáne Ózbekstan Syrtqy ister mınıstrleri keńesiniń alǵashqy otyrysynyń hattamasyna qol qoıyldy.
Aıta keteıik, byltyr eki eldiń taýar aınalymy 4 mlrd dollardan asty. Bul kórsetkishti 10 mlrd dollarǵa deıin ulǵaıtý maqsaty tur. Qazaqstan Ózbekstanǵa negizinen bıdaı, metall, munaı ónimderin, avtokólik eksporttaıdy. Al Ózbekstannan Qazaqstanǵa — avtokólik, jemis, kókónis, kirpish, kafel, azot tyńaıtqyshtary keledi.