Táýelsizdik jyldarynda QR Ulttyq kitaphanasynyń kitap qory qalaı jańartyldy
2020 jyly Qazaqstan Respýblıkasy Prezıdenti Q.Toqaevtyń Jarlyǵyna sáıkes Qazaqstan Respýblıkasynyń Ulttyq kitaphanasyna «Ulttyq» mártebesi berildi. Búgingi kúni Almaty qalasyndaǵy Ulttyq kitaphana Qazaqstandaǵy eń iri mádenı, bilim berý jáne aqparattyq ortalyǵy. QR Ulttyq kitaphanasynyń dırektory, Qazaqstandyq Kitaphanalyq Odaqtyń tóraıymy Baqytjamal Ospanova QazAqparat tilshisine kitaphananyń kitap qory, qordyń osy kezeń ishindegi qalyptasýy men jańarýy, oqyrmandar arasynda qandaı týyndylar úlken suranysqa ıe ekendigi týraly aıtyp berdi.
- Qazaqstan táýelsizdiginiń 30 jyly ishinde Ulttyq kitaphana qory qandaı týyndylarmen, ádebıettermen tolyqty?
- Qazaqstan Respýblıkasynyń Ulttyq kitaphanasy – ulttyq jáne álemdik rýhanı murany jınaqtaıtyn jáne san myńdaǵan oqyrmannyń aqparattyq qajettilikterin qanaǵattandyrýǵa baǵyttalǵan aǵartýshylyq qyzmetti júzege asyryp otyrǵan biregeı mádenıet ortalyǵy.
Ulttyq kitaphana elimizdiń basty memlekettik kitap saqtaýshy qoımasy bolyp tabylady. Kitaphana qory ámbebap, onda barlyq taqyryptyq baǵyttaǵy jáne bilimniń barlyq salasyn qamtıtyn qujattar, álemniń ár túrli tilderindegi ádebıetterdiń barlyq túrleri bar, ol, shyn máninde halqymyzdyń baǵa jetpes murasy bolyp tabylady. Táýelsizdiktiń 30 jyly ishinde oqyrmandar sany kúnnen kúnge artyp, olardyń aqparatqa erkin jáne shekteýsiz qoljetimdiligin qamtamasyz etý maqsatynda kitaphana qory otandyq jáne sheteldik ádebıettermen tolyqtyryldy.
Qordy ózekti ádebıettermen qalyptastyrý - kitaphananyń negizgi basymdyqtarynyń biri. Bizdiń oqyrmandardyń aqparattyq qajettilikterin tolyǵymen qanaǵattandyrý maqsatynda jyl saıyn kitap qoryn ǵylymı, tarıhı, ǵylymı-kópshilik jáne qazirgi zamanǵy taqyryptar boıynsha jańa otandyq jáne sheteldik ádebıettermen, sondaı-aq, mádenı, ǵylymı jáne kórkem qundylyǵy joǵary basylymdarmen, basqa da aqparattyq resýrstarmen tolyqtyrý óte mańyzdy.
Qordy tolyqtyrýdyń negizgi kózi – Qazaqstan Respýblıkasynyń «Mádenıet týraly» jáne «Buqaralyq aqparat quraldary týraly» zańdaryna sáıkes basylymdardyń mindetti tegin danalary, olar ulttyq repertýardy barynsha tolyq qamtamasyz etýge yqpal etedi.
Sondaı-aq, qor «Ádebıettiń áleýmettik mańyzdy túrlerin basyp shyǵarý» jáne «Qazaqstan Respýblıkasynda tilderdi damytý men qoldanýdyń memlekettik baǵdarlamasy» memlekettik baǵdarlamalary, satyp alý (ádebıetter men merzimdi basylymdardy satyp alý), syıǵa tartý, halyqaralyq kitap almasý jáne t.b. joldar arqyly tolyqtyrylady.
Qazaqstan Respýblıkasy Mádenıet jáne sport mınıstrliginiń «Ádebıettiń áleýmettik mańyzdy túrlerin basyp shyǵarý» baǵdarlamasyna sáıkes qorǵa negizinen qoǵamdyq-saıası, ǵylymı, anyqtamalyq, oqýlyqtar jáne kórkem ádebıetter túsedi. Syıǵa berilgen basylymdar qordy tolyqtyrýdyń turaqty kózi bolyp tabylady. Syıǵa tartqan ádebıetterdiń kómegimen kitaphana qory burynǵy jyldardaǵy qorda joq basylymdarmen ǵana emes, sonymen qatar, qaǵaz jáne elektrondy tasymaldaǵyshtaǵy jańa qujattarmen tolyqtyrylady. Avtorlar óz kitaptaryn qorǵa tapsyrý úshin arnaıy ákeledi nemese poshta arqyly jiberedi, sonymen qatar, jańa kitaptardyń tusaýkeserleri kezinde kitaptaryn syıǵa tartady.
Belgili qaıratkerler, aqyn-jazýshylardyń jeke kitaphanalarynan da ádebıetter qorǵa tapsyrylady, mysaly, Qazaqstannyń kórnekti jazýshylary Sábıt Muqanovtyń, Muzafar Álimbaevtyń, Qalıjan Bekhojınniń, Gerold Belgerdiń jáne Ázilhan Nurshaıhovtyń jeke kitaphanalarynan qundy ádebıetter, burynǵy dıplomat, elshi Bolathan Taıjanovtyń jeke kitaphanasynan biregeı ǵylymı basylymdar tapsyryldy. Mundaı mysaldar óte kóp.
Ulttyq kitaphana «Mádenı mura» memlekettik baǵdarlamasy aıasynda jaryq kórgen basylymdardyń depozıtarııi bolyp tabylady. Bul basylymdar biregeıligimen jáne qaıtalanbas týyndylarymen erekshelenetin halqymyzdyń qazirgi mádenı murasynyń ajyramas baılyǵyna, rýhanı qazynasyna aınaldy. Búgingi tańda bul kitaptar kitaphana oqyrmandary arasynda joǵary suranysqa ıe, olar tarıh, arheologııa, fılosofııa, pedagogıka, saıasat, sáýlet, ekonomıka, zań, etnografııa jáne mádenıet týraly kitaptar, entsıklopedııalyq sózdikter, anyqtamalyqtar jáne qazaqstandyq jazýshylardyń kórkem shyǵarmalary. Olardyń ishinde 100 tomdyq qazaq folklorynyń jınaǵy «Babalar sózi», 20 tomdyq «Qazaq halqynyń fılosofııalyq murasy», «Álemdik fılosofııalyq mura» sııaqty biregeı serııalar, 20 tomdyq «Ádebı jádigerler», 14 tomdyq «Tarıh - adamzat aqyl-oıynyń qazynasy, 10 tomdyq «Qazaq ádebıetiniń tarıhy», «Adamzat aqyl-oıynyń qazynasy. Psıhologııa», «Qazaqtyń ata-zańdary» jáne basqalary, sonymen qatar, qazaq tiline aýdarylǵan álem klassıkteri úzdik týyndylarynyń aýdarmalarynan turatyn «Álem ádebıeti kitaphanasy» serııasy, «Álemdik saıasattaný antologııasy», «Álemdik áleýmettaný antologııasy» jáne t.b. Sondaı-aq, Orta ǵasyrlardaǵy áýender, onyń ishinde kúıler, tarıhı óleńder zerttelip, dástúrli ánder antologııasy shyǵaryldy. «Mádenı mura» baǵdarlamasy shyn máninde ulttyq tarıhı-mádenı muramyzdy túgendep, qaıta jańǵyrtýda aıryqsha úles qosqan mańyzdy joba boldy. Bul týraly kóp aıtylyp ta,
Oqý zalynda oqyrmandarǵa «Mádenı mura» memlekettik baǵdarlamasy aıasynda 537 ataýmen basylyp shyqqan kórkem jáne salalyq ádebıetter qoljetimdi. Baǵdarlama aıasynda Ulttyq kitaphana mamandary Qytaı, Monǵolııa, Germanııa, Reseı, Vatıkan, Frantsııa, Armenııa, t.b. elderdiń muraǵattary men kitaphanalarynan jazba derekterdi anyqtaý maqsatynda uıymdastyrylǵan ǵylymı-izdestirý ekspedıtsııa jumystaryna qatysyp, nátıjesinde qazaq halqynyń tarıhyna, etnografııasyna, mádenıeti men ónerine qatysty buryn ǵylymı ortaǵa beımálim kóptegen qundy qujattar men derekter ákelindi.
Ulttyq kitaphanada 2012 jyldan bastap Almaty qalasyndaǵy Qazaqstan halqy Assambleıasynyń (QHA) depozıtarııi jemisti jumys isteıdi, onyń maqsaty - etnosaralyq jáne konfessııaaralyq qatynastar salasyndaǵy ǵylymı jumystar, zertteýler qoryn qalyptastyrý jáne nasıhattaý. Depozıtarııde jınaqtalǵan derekti jáne kórkem ádebıetter bizdiń elimizdiń aýmaǵynda ómir súrip jatqan túrli etnostardyń tarıhy men qazirgi ómirin beıneleıdi, qýǵyn-súrginge ushyraǵan halyqtardy deportatsııalaý úrdisterin, olardyń rýhanı mádenıeti, dástúrleri men óneriniń damýyn ashyp kórsetedi.
- Shet elderden qandaı jáne qansha kitap satyp alyndy?
- Kitaphana qory Halyqaralyq kitap almasý qyzmeti men birqatar jobalar aıasynda alys jáne jaqyn shetelderden keletin basylymdarmen de tolyqtyrylady. Mysaly, «Eýrazııa qory» jobasy boıynsha AQSh-tyń jetekshi baspalarynan aǵylshyn tilindegi kitaptar, «Qytaımen tanysý» aýqymdy baǵdarlamasy boıynsha aǵylshyn jáne qytaı tilderinde qytaı fılosofııasy, zań ǵylymdary, tarıhy, mádenıeti men óneri boıynsha basylymdar tústi, «Pýshkın kitaphanasy» megajobasy boıynsha biz óz qorlarymyzdy Reseıdiń jetekshi baspalarynyń sońǵy ónimderimen, mádenıettaný, fılosofııa, zań, ekonomıka, lıngvıstıka, ádebıettaný jáne t.b. zamanaýı jáne ózekti basylymdarmen tolyqtyrdyq. AQSh (JDP) «Jýrnaldardy tartý etý» jobasy boıynsha óner, dızaın jáne mádenıet týraly basylymdar, «Japonııa týraly kitaptar satyp alý» halyqaralyq jobasyna sáıkes qorymyz Japonııa týraly aǵylshyn tilindegi qundy basylymdarmen tolyqtyryldy, olardy «Japan Foundation» aqparattyq-resýrstyq ortalyǵy tapsyrdy.
«Túrki álemi kitaphanalaryna kitap syılaý. Kitap - eń senimdi kópir (Qazaqstan)» ILESAM ǵylymı-ádebı shyǵarmalar avtorlarynyń túrik kásibı birlestigi jobasy aıasynda Túrkııa tarıhy men ǵylymyna, kórkem ádebıetine qatysty 5000-nan asa kitap, balalar basylymdary jáne anyqtamalyq basylymdar, sózdikter, entsıklopedııalar, sonymen qatar, medıtsınalyq, áleýmettik mańyzdy, ǵylymı-kópshilik jýrnaldarmen tolyqtyryldy. Kitaptar TIKA Túrik yntymaqtastyq jáne úılestirý agenttigi men Túrkııanyń Mádenıet jáne týrızm mınıstrliginiń qoldaýymen tapsyryldy.
Dúnıejúzilik bank, Ortalyq Azııa aımaqtyq ekonomıkalyq yntymaqtastyq departamenti, Eýrazııalyq damý banki, Islam damý banki jáne Birikken Ulttar Uıymy ekonomıka jáne zań ádebıeti boıynsha aǵylshyn jáne orys tilderindegi kitaptar jınaǵyn turaqty túrde syıǵa tartady. Almatydaǵy Gete Instıtýty kitaphanaǵa únemi qoldaý kórsete otyryp, qordy tolyqtyrý maqsatynda nemis tilindegi kitaptar men merzimdi basylymdardy tegin tapsyrady.
Halyqaralyq kitap almasý jobasy aıasynda shet memleketter - AQSh Kongress kitaphanasynan, Germanııa, Italııa, Bolgarııa, Frantsııa, Polsha, Túrkııa, Chehııa, Qytaı, Úndistan, Mońǵolııa, Pákistan, Taıland, Vetnam, Koreıa, Reseı jáne TMD elderiniń ulttyq kitaphanalarynan kitaptar túsip otyrady.
Kitaphana qory kitaphanada ornalasqan shet elderdiń kitap buryshtaryn tolyqtyrý esebinen de tolyqtyrylady, búgingi tanda Túrkııa, Qytaı, Reseı, Iran, Pákistan, Koreıa jáne Úndistannyń kitap buryshtary jemisti jumys isteýde. Kitap buryshtarynyń maqsaty - osy atalǵan elderdiń ulttyq mádenıeti, tarıhy jáne ana tilderindegi ádebıeti týraly nasıhattaý jáne aqparattandyrý. Ár buryshtyń osy elderdiń dıplomatııalyq ókildikteri tolyqtyryp otyratyn qosalqy kitap qorlary bar.
- Ulttyq kitaphananyń baı qorynda búgingi kúni qansha kitap bar?
- Kitaphana qorynda ulttyq jáne álemdik mádenıettiń eń qundy jazba eskertkishteri bar. Munda qazaq kitaptarynyń jáne Qazaqstan týraly kitaptardyń, ózge de biregeı toptamalar men jınaqtardyń, qoljazbalyq qujattardyń, beıneleý óneri týraly basylymdardyń, kartografııalyq, notaly-mýzykalyq basylymdardy, sondaı-aq zamanaýı qujattardyń eń tolyq jıyntyǵy jınaqtalǵan. Kitap qory ártúrli tasymaldaǵyshtardaǵy jáne álem halyqtarynyń 123 tilinde 7 mıllıonnan astam basylymdar birligin quraıdy.
Kitaphananyń sırek kezdesetin kitaptar men qoljazbalar qorynda 40 myńnan astam qujat bar, olardyń 1000-nan astamy qoljazbalar. Biz zertteýshiler úshin ǵylymı qyzyǵýshylyq týdyratyn HІІ-HІH ǵasyrlardaǵy tarıh, geografııa, medıtsına, matematıka, fılosofııa, lıngvıstıka jáne basqalar boıynsha shyǵys qoljazbalarynyń baı qorymen maqtana alamyz. Qoljazbalar arab, parsy, túrki, túrik, ózbek, shaǵataı jáne basqa tilderde jazylǵan.
Qorda saqtalǵan qoljazbalardyń ishindegi eń qundylary - kýfa jazýmen jazylǵan XIІ ǵasyrdyń Qurany, túrki jazba eskertkishi - Fırdoýsıdiń shaǵataı tilindegi «Shahname» (XVIII ǵ.) týyndysy, 2003 jyly ıÝNESKO-nyń «Álem jady» baǵdarlamasynyń Halyqaralyq tizilimine engizilgen Qoja Ahmet ıAsaýıdiń «Dıýanı hıkmetter» (2 qoljazba, XIX ǵ.), «Rısala: Mıratýl-qýlýb» (XVIII ǵ.), «Nasabnama»: Qoja Ahmet ıAsaýıdiń ata-tegi týraly shejire (XVII ǵ.) jáne Súleımen Baqyrǵanıdyń «Hıkmetter» (XVI ǵ.) qoljazba kitaptary bolyp tabylady. 2019 jyly uzaq jylǵy júrgizilgen ǵylymı-zertteý jumystarynyń nátıjesinde Súleımen Baqyrǵanıdiń «Hıkmat al Hazret Sultan-Garıfın» qoljazbasynyń aýdarmasy men faksımılesi alǵash ret jaryq kórgenin aıta ketken jón.
Quran toptamalarynyń ishinde arab tilindegi «nash» jazýymen jazylǵan XVIII ǵasyrdaǵy eń úlken «Quran» (1042 bet, salmaǵy 9100 g.) bar, onyń jolma-jol parsy tilindegi aýdarmasy bar. Bul jınaqta tolyq mátini bar basqa Qurandar da bar, biraq negizgi bóligi 3-4 súreden turatyn tolyq emes mátini bar Qurandar, olar birneshe ret qaıta jazylyp, Qazaqstan aýmaǵynda keń taralǵan, XV-XIX ǵasyrda jazylǵan qoljazbalar.
Sırek baspa kitaptarynan qazaq ádebıeti klassıkteriniń eńbekteri, qazaq aǵartýshylarynyń kózi tirisindegi basylymdary bar. Qorda Qazaqstannyń alǵashqy merzimdi basylymdary – «Túrkistan oblystyq vedomstvolary» 1879-1917 j., «Qazaq» 1913-1918 j., «Eńbekshi Qazaq» 1923-1932 j. jáne t.b. gazetter, «Aıqap» 1911-1917 j., «Abaı» 1918 j., «Sholpan» 1922 j. jáne basqa jýrnaldar saqtalǵan.
XVIII-XIX ǵ. slavıan jáne koreı kitaptarynyń toptamalary bıblıografııalyq qundylyqtar bolyp tabylady. Jınaqta shirkeý slavıan jáne kóne shirkeý slavıan qoljazbalary bar. Olardyń kópshiligi bylǵarydan jasalǵan, metall, mys qapsyrmalarynda.
Qazaq mýzykasynyń biregeı fonoteka qory 3700 kúıtabaqty quraıdy, olardyń ishinde qazaq mýzykasynyń sırek jazbalary: Dına Nurpeıisovanyń, Dáýletkereıdiń, Jaıaý Musanyń, Aqan Seriniń, Mádıdiń shyǵarmalary, Ámire Qashaýbaevtyń, Kúlásh Baıseıitovanyń, Manarbek Erjanovtyń, Qanabek Baıseıitovtiń, Júsipbek Elebekovtiń, Bıbıgúl Tólegenovanyń, Roza Baǵlanovanyń jáne t.b. daýystary bar.
Sonymen qatar, bizde ǵylymnyń barlyq salalary boıynsha qorǵalǵan qazaqstandyq ǵalymdar men TMD elderi ǵalymdarynyń kandıdattyq jáne doktorlyq dıssertatsııalarynyń ǵylymı qory, Qazaqstan Respýblıkasy men TMD elderi ǵalymdarynyń avtoreferattary, QR dıssertatsııalarynyń dástúrli jáne elektrondyq katalogtary, SD, DVD-daǵy reseılik ǵalymdardyń dıssertatsııalary, on-line rejımindegi reseılik ǵalymdardyń dıssertatsııalary men avtoreferattarynyń tolyq mátini bar Reseı memlekettik kitaphanasy dıssertatsııalarynyń elektrondy kitaphanasy usynylǵan.
- Qazaqstan Respýblıkasy Táýelsizdiginiń 30 jyldyǵy aıasynda kitaphanada qandaı is-sharalar ótkizilýde?
- Bıyl tuǵyrly Táýelsizdigimizge 30 jyl. Bul ulttyq tarıhymyzdaǵy asa mereıli bir beles. Osy aıtýly mereıtoı aıasynda birtýar tulǵalardy eske alyp, olardyń murasyn qazirgi jastarǵa, óskeleń urpaqqa pash etý – bizdiń paryzymyz.
Bıylǵy jyly barlyq is-sharalar Táýelsizdiktiń 30 jyldyǵy aıasynda ótip jatyr. Biz qazaqtyń halyq aqyny, jyrshy Jambyl Jabaevtyń 175 jyldyǵyn, qazaq aqyny Muqaǵalı Maqataevtyń 90 jyldyǵyn, qoǵam qaıratkeri, jýrnalıst, etnograf Álıhan Bókeıhanovtyń 155 jyldyǵyn, aty ańyzǵa aınalǵan qazaq balýany Qajymuqan Muńaıtpasovtyń 150 jyldyǵyn, t.b. belgili tulǵalardyń mereıtoılaryn atap óttik. Osy mańyzdy datalarǵa oraı poezııa keshteri, ádebı-mýzykalyq keshter, kitap kórmeleri, dóńgelek ústelder jáne basqa da saltanatty sharalar uıymdastyrylýda.
Naýryz aıynda Jambyl Jabaevtyń mereıtoıyna oraı kitap kórmeleri uıymdastyryldy, «Dala aqyny Jambyl Jabaev álem ádebıetinde» vırtýaldy kórme daıyndaldy, «Jyr alyby Jambyl» atty mýzykalyq-poezııalyq kesh ótkizildi, Álıhan Bókeıhanovtyń 155 jyldyq mereıtoıyna arnalǵan dóńgelek ústel ótkizilip, «Ulttyń uly kósemi» atty kórkemdelgen kitap kórmesi uıymdastyryldy.
Qazaqstan Respýblıkasynyń Ulttyq kitaphanasy «Qyrym araly» ǵylymı-qalpyna keltirý zerthanasymen birlesip uıymdastyrǵan «Zaman aǵymyndaǵy Qazaqstannyń jazba mádenıeti: jazý tarıhy jáne jazba eskertkishterdiń qaıta jańǵyrýy» ekspozıtsııalyq kitap kórmesimen Qazaqstan Respýblıkasy Táýelsizdiginiń 30 jyldyǵyna arnalǵan qujattyq jáne kitap kórmeleriniń tsıkly ashyldy. Barlyq oqý zaldarynda táýelsizdikke arnalǵan túrli taqyryptardaǵy kitap kórmeleri uıymdastyryldy.
Alǵys aıtý kúni merekesine arnalǵan birqatar is-sharalar ótkizildi: «Rahmet saǵan, Uly dala eli!» atty kitap kórmesi Qazaqstan halqy Assambleıasy ókilderiniń qatysýymen «Shyn júrekten alǵys aıtamyn» onlaın alǵys aıtý keshi; «Alǵys aıtý - adamı paryzymyz»: pandemııa kezinde koronavırýstyq ınfektsııamen kúreste úlken úles qosqan medıtsına jáne quqyq qorǵaý organdarynyń qyzmetkerlerimen kezdesý; «Ardagerlerge qurmet» kitaphana ardagerlerine qoldaý kórsetý aktsııasy; «Aıaly alaqan» qaıyrymdylyq aktsııasy - №1 Balalar úıine kómek kórsetý jáne t.b. is-sharalar uıymdastyryldy.
Memleket Basshysy Qasym-Jomart Toqaevtyń tapsyrmasyna oraı ázirlengen Naýryz meıramyn atap ótý tujyrymdamasyna sáıkes Ulttyq kitaphana 14-23 naýryz aralyǵynda «Naýryznama» onkúndik onlaın is-sharalar tsıklyn usyndy. Іs sharalar aıasynda qazaq halqynyń ejelden kele jatqan salt-dástúr, ádet-ǵuryptary, ulttyq qundylyqtary keńinen nasıhattaldy.
Táýelsizdik mereıtoıyna tartý retinde Ulttyq kitaphana «Tuǵyry bıik Táýelsizdik» atty bıblıografııalyq kórsetkish daıyndady. Tarıhı, ǵylymı, ádebı jáne basqa da tanymdyq-tanymdyq kitaptar men aqparat kózderi, shyn máninde, táýelsizdik shejiresi. Sondaı-aq, qazaq halqynyń uly tulǵalarynyń mereıtoılary aıasynda «Jambyl Jabaev», «Muqaǵalı Maqataev», «Salyq Zımanov» jáne basqa da bıblıografııalyq basylymdar shyǵaryldy.
Aǵymdaǵy jyly kórnekti memleket jáne qoǵam qaıratkeri, ekonomıka jáne saıasat ǵylymdarynyń doktory, Eýrazııalyq damý ortalyǵynyń bas dırektory Taıyr Mansurovtyń táýelsizdik jyldarynda daıyndap, jaryq kórgen 2500 dana kitapty kitaphana qoryna syıǵa tartý rásimi ótti. Olardyń ishinde Elbasy Nursultan Nazarbaev jáne dıplomat, qoǵam qaıratkeri Názir Tórequlovqa, sondaı-aq eýrazııalyq ıntegratsııa men halyqaralyq qatynastarǵa arnalǵan biregeı kitaptar bar. Sondaı-aq, qazaqtyń uly aqyndary – Abaı, Jambyl jáne Maǵjan Jumabaevtardyń tańdamaly shyǵarmalary, «Rýsskıı Rarıtet» baspasynan «Ǵasyrlar danalyǵy» serııasymen jaryq kórgen «Abaı jáne Pýshkın» jınaǵy da oqyrmandardyń erekshe qyzyǵýshylyǵyn týdyrýda.
Jeltoqsan oqıǵalarynyń 35 jyldyǵyna oraı «Arys» baspasynan shyqqan «Jeltoqsan. Dekabr. 1986. Derekti hronıka» atty jańa kitaptyń tusaýkeseri ótti. Kitapta 1986 jylǵy Jeltoqsan oqıǵasynyń sebepteri men mán-jaıyn zertteýge arnalǵan materıaldar qamtylǵan. Sondaı-aq «Atamura» baspasy Qaıym-Munar Tabeevtiń jeltoqsan kóterilisi men oǵan qatysýshylar jaıly aqparat beretin «Qaraǵaıdyń qarsy butaǵy» (Jeltoqsan týraly ápsana») atty jańa kitabynyń 10 danasyn kitaphana qoryna syıǵa tartty.
Ózderińizge belgili, ótken jyly Memleket basshysy Qasym-Jomart Toqaev Ulttyq qoǵamdyq keńestiń tórtinshi otyrysynda sóılegen sózinde kitaphanalar men kitaptyń qoǵam damýynda, qorshaǵan dúnıeni tanýdaǵy róli týraly atap ótti. Kitap oqý máselesine toqtala kele, kitap oqý mádenıetin qalyptastyrý, onyń ishinde balalar men jasóspirimderdiń kitap oqýǵa degen qyzyǵýshylyǵyn arttyrý jóninde tapsyrmalar berdi.
Osy tapsyrmany oryndaý maqsatynda jáne Qazaqstan Respýblıkasy Mádenıet jáne sport mınıstrliginiń bastamasymen bıylǵy jyl «Balalar men jasóspirimderdi oqýdy qoldaý jyly» dep jarııalandy, onyń aıasynda respýblıka boıynsha kitap oqýdy qoldaýǵa baǵyttalǵan túrli mádenı is-sharalar ótkizilýde. Sondaı-aq, «Oqıtyn ult» jobasy aıasynda halyqty kitap oqýǵa tartý, kitap oqýdy belsendirý sharalary qolǵa alynbaq. Búgingi tańda respýblıka kitaphanalary sapaly kitap oqýdy nasıhattaý, jastardy kitap oqýǵa baýlý jumystaryn kúsheıtýde.
Bizdiń maqsatymyz - oqyrmandardy kitaphanaǵa, halyqtyń túrli toptaryn álemdik jáne qazaqstandyq qundylyqtarǵa tartý, júıeli túrde kitap oqý daǵdylaryn qalyptastyrý negizinde tájirıbelik jáne irgeli bilim alýǵa jumyldyrý, qoǵamnyń aqparattyq mádenıetine, kitap oqýǵa, otandyq tarıh pen mádenıetke turaqty qyzyǵýshylyǵyn qalyptastyrý boıynsha jumys júrgizý. Sol arqyly qoǵamnyń rýhanı jańǵyrýyna yqpal etý.
Osy múmkindikti paıdalana otyryp, barsha qazaqstandyqtardy ulttyq merekemiz jáne tarıhı mereıtoımen – Qazaqstan Respýblıkasy Táýelsizdiginiń 30 jyldyǵymen quttyqtap, amandyq, turaqtylyq pen órkendeý tileımin!
- Áńgimeńizge rahmet!
