Táýelsizdik kúni merekesi qarsańynda Atyraýda 100 oryndyq jataqhana ashyldy
Jańa jataqhana Elbasy – Tuńǵysh Prezıdenttiń bes áleýmettik bastamasy aıasynda salynǵan. Onyń qurylysy «Teńizshevroıl» JShS-niń «Igilik» áleýmettik baǵdarlamasymen qarjy bólingen. Zamanaýı úlgide boı kótergen tórt qabatty jataqhana bólmeleri kúndelikti turmysqa qajetti jabdyqtarmen qamtamasyz etilgen. Munda stýdenttermen birge jas otbasylar da tura alady. Ár qabatta 4 teledıdar men 12 avtomatty kir jýý mashınalary bar.
«Jarty ǵasyrǵa jýyq tarıhy bar, óńirimizdegi asa qajetti mamandar daıarlaıtyn oqý ornynyń keregesi keńeıdi. Atyraý energetıka jáne qurylys kolledjiniń 100 oryndyq jańa jataqhanasy qoldanysqa berilýde. Qazir óńirdegi 24 tehnıkalyq jáne kásiptik bilim berý uıymdarynda 15 myńnan astam stýdent bilim alady. Olardyń jataqhanaǵa degen suranysyn 2022 jylǵa deıin sheshýdi kózdep otyrmyz. Elbasynyń «Bes áleýmettik bastama» úndeýindegi tapsyrmasyna sáıkes, 2018 jyly arnaıy jol kartasy qabyldandy. Sonyń aıasynda 2 jataqhananyń qurylysy aıaqtaldy. Al Atyraý qalasy jáne Inder men Jylyoı aýdandarynda kolledj jataqhanalary salynyp jatyr», dedi aımaq basshysy Mahambet Dosmuhambetov.
Qazir bul kolledjde 773 stýdent oqıdy. Onyń 189-i – aýyldyq eldi mekenderden kelgen jastar. Sondaı-aq, ınjener-oqytýshylyq quramynda 93 maman bolsa, onyń 20-y ózge óńirler men aýyldardan kelgen.
