Taýar baǵasy qymbattaı ma – Dálenovtiń jaýaby

NUR-SULTAN. QazAqparat – Valıýta baǵamynyń ózgerýine baılanysty elimizde azyq-túlik taýarlarynyń baǵasy qymbattamaýy tıis. Bul týraly QR Ulttyq ekonomıka mınıstri Rýslan Dálenov Úkimet úıindegi baspasóz máslıhaty barysynda aıtty, dep habarlaıdy QazAqparat tilshisi.

«Baǵa óte mańyzdy másele. Muny azyq-túlik jáne azyq-túlik emes taýarlar dep eki bólikke bólip qarastyrýǵa bolady. Aýyl sharýashylyǵy mınıstrliginiń aqparatyna sáıkes, azyq-túlik taýarlarynyń basym bóligi elimizde óndiriledi, jergilikti resrýstarǵa baılanǵan. Sondyqtan valıýtanyń, dollardyń teńgege baǵamynyń ózgerýi saldarynan baǵa ózgeriske ushyramaýy tıis. Azyq-túlik baǵasyna maýsymdyq jaǵdaılar, taýarlyq kedergiler syndy jaıttar áserin tıgizýi múmkin. Básekelestiktiń bolmaýy, ymyralasý da baǵaǵa áser etýi yqtıal», - dedi mınıstr BAQ ókilderiniń saýalyna oraı.

Onyń aıtýynsha, tehnıkalar, elektrondy tehnıkalar, farmatsııa syndy otandyq óndiris joq nemese laıyqty emes taýarlarǵa teńge baǵamynyń ózgeriske ushyraýy áserin tıgizedi.

«Degemen, biz mundaı jaıtty 2009 jyly, 2016 jyly bastan keshirgen edik. Ol birneshe baǵytty bolyp keledi. Eń aldymen farmatsııa salasynda sharttasý ınstıtýty bar. Biryńǵaı dıstrıbıýtor negizgi taýarlarǵa sharttasyp qoıdy. Elektronıka salasyna qatysty aıtar bolsaq, álemdik brendter aldyn ala jergilikti jerdiń suranysyna baǵanyń saı bolýyn eskeredi. Sondyqtan elektronıka salasynda ádette baǵa burynǵy deńgeıde qalady. Baǵa ymyralasýlardyń barlyǵynyń aldymen eskertý túrinde, odan keıin tekserý túrinde joly kesiledi. Sondyqtan biz ınflıatsııalyq protsesti syrtqy áserler qoılasyz bolyp turǵannyń ózinde baqylap otyrýǵa bolady dep sanaımyz», - dedi Rýslan Dálenov.