Tatarstanda túrki áleminiń aǵash sheberleri bas qosady

ASTANA. QazAqparat - Bıyl 19-20 jeltoqsan kúnderi Tatarstannyń Ǵylym akademııasynda «Túrki álemindegi aǵash joný óneri: ótkeni men búgini» taqyrybynda halyqaralyq sımpozıým ótedi, dep habarlaıdy TWESCO saıty .

Sharany TR ǴA Ǵ.Ibragımov atyndaǵy til, ádebıet jáne óner ınstıtýty men Ónertanýshylar qaýymdastyǵynyń tatar bólimi (TatAIS) uıymdastyrady.

Sımpozıým túrki halyqtarynyń materıaldy jáne rýhanı murasyn nasıhattaý jáne damytý maqsatynda Ǵ.Ibragımov atyndaǵy til, ádebıet jáne óner ınstıtýty 2008 jyldan beri júrgizip kele jatqan «Túrki áleminiń óneri» tsıkldiq jobasy sheńberinde ótkiziledi.

Halyqaralyq is-shara 2 kúnge josparlanǵan. Birinshi kúni ǵylymı-praktıkalyq konferentsııa ótse, ekinshi kúni qatysýshylar sýretshiler men eriktilerge arnalǵan sheberlik sabaqtaryna qatysyp, aǵash jonýdyń zamanaýı úrdisterine arnalǵan kórme jumysymen tanysa alady.

Sımpozıým jumysy negizinen aǵash sheberleriniń dástúrleri men búgingi damýy, kórme isiniń menedjmenti men PR-tehnologııalary, mýzeı kollektsııalarynyń analızi jáne etnotýrızm máseleleri baǵytynda júredi dep josparlanýda.

Atalǵan jıyn týraly tolyǵyraq myna siltemeden bilýge bolady.