Tatarstanda aýdaryspaqtan respýblıkalyq chempıonat ótedi

ARSK. TATAR-INFORM - QazAqparat – Tatarstannyń Jańa Qyrlaı aýylynda aýdaryspaqtan (aýdarysh) tuńǵysh jarys ótti, dep habarlaıdy QazAqparat «Tatar-ınform» aqparat agenttigine silteme jasap.

Agenttiktiń habarlaýynsha, Tatarstanda aýdaryspaq sportyn damytý qolǵa alynǵan. «Jylqy kúni» atty besinshi jyl qatarynan uıymdastyrylyp jatqan jarys aıasynda bıyl tuńǵysh ret aýdaryspaq saıysy ótti.

«Aýdarysh» oıynynyń tóreshisi, ári bapker Ýel Badyqshanov osy saıys arqyly tatardyń kóne sportyn jandandyrý kózdelgenin aıtady.

«Babalarymyz osy saıys arqyly kúsh synasqan. Tatarstanda ony jandandyrýdy birinshi bolyp biz qolǵa aldyq. Bastama kóterip, uıymdastyryp júrgen «Almaqaı» jylqy fermasynyń ıesi Farıd Nabıýllın», - deıdi Ýel Badyqshanov.

Saıys tóreshisi aýdaryspaq saıysyn keleshekte búkil Reseı boıynsha, keıin álemdik deńgeıde ótkizýdi josparlaǵandaryn aıtady.

«Aýdarysh» oıynyna tatardyń taza qandy attary miniledi. Arnaıy sahnada atqa mingen eki balýan bir-birine shabýyldap, qarsylasyn erden aýdaryp tastaýy tıis. Ol úshin tek belge baılanǵan oramaldan tartý kerek. Basqa tásilder esepke alynbaıdy. Qaıta jandanǵan sport túrinen alǵashqy respýblıkalyq chempıonat Lenınogorda 29 qyrkúıek kúni ótedi», - dep jazdy «Tatar-ınform» aqparat agenttigi.