Tasmanııada álemdegi eń úlken elektrlik keme sýǵa jiberildi
Tasmanııadan álemdegi eń úlken elektrli keme saparǵa attandy. Uzyndyǵy 130 metrlik keme ataqty ýrýgvaılyq aktrısa China Zorrilla qurmetine atalǵan. Ol Incat Tasmania keme jasaý zaýytynda Buquebus kompanııasy úshin salyndy.
AZƏRTAC agenttiginiń sheteldik BAQ-qa silteme jasap habarlaýynsha, bastapqyda Hull 096 jobasy suıytylǵan tabıǵı gazdy (STG) otyn retinde paıdalanýdy kózdegen. Alaıda keıin elektr qýatyna kóshý týraly sheshim qabyldanyp, bul álemdegi eń úlken elektrli kemeni jasaýǵa múmkindik berdi. Kemeniń bortynda 250 tonnadan astam akkýmýlıator ornatylǵan, al energııa saqtaý júıesiniń (ESS) syıymdylyǵy 40 megavatt saǵat, bul teńiz kóligindegi uqsas júıelerden tórt ese kóp.
Keme Argentına astanasy Býenos-Aıres pen Ýrýgvaıdaǵy Kolonııa qalasy arasynda jolaýshylar tasymalymen aınalyspaq. Ol 2100 jolaýshy men 225 avtokólikke deıin syıdyra alady. Teńiz kóligi tarıhynda alǵash ret mundaı úlken keme tek akkýmýlıatorlyq tehnologııalarǵa súıenip jumys isteıtin bolady.
Sýǵa túsirilgennen keıin kemeniń ishki árleý jumystary jalǵasady, al ashyq teńizdegi sońǵy synaqtar 2025 jyldyń sońyna josparlanǵan.
Halyqaralyq energetıkalyq agenttiktiń (IEA) habarlaýynsha, 2022 jyly teńiz kóligi energııaǵa baılanysty kómirqyshqyl gazynyń barlyq shyǵaryndysynyń shamamen 2 paıyzyn quraǵan. Tasymal suranysynyń artýyna baılanysty, kemeler úshin taza energııa kózine kóshý klımattyń ózgerýimen kúrestiń ajyramas bóligine aınalyp otyr.
Ótken aıda Halyqaralyq teńiz uıymyna (IMO) múshe elder keme qatynasynan shyǵatyn zııandy gazdardy azaıtý jáne bul salany 2050 jylǵa qaraı kómirtegi beıtarap etý maqsatyn belgileý úshin daýys berdi. Shyǵaryndylardy qysqartýǵa baǵyttalǵan sharalar júıesi otynǵa qoıylatyn standarttardy engizýdi jáne belgilengen shekterden asatyn shyǵaryndylar úshin tólem alýdy qamtıdy.
China Zorrilla kemesiniń sýǵa túsý rásimi Tasmanııanyń Hobart qalasyndaǵy Incat zaýytynda ótti. Sarapshylardyń pikirinshe, elektrli kemeler dástúrli qazba otyndaryn paıdalanatyn kemelermen salystyrǵanda parnıktik gazdar shyǵaryndylaryn edáýir qysqarta alady.
Aıta ketelik «Tıtanık» kemesinde aman qalǵan jolaýshynyń haty £300 000 satylǵan edi.