Tasqynnan evakýatsııalanǵan adamnyń sany 97 myńnan asty
ASTANA. KAZINFORM – Tasqynǵa baılanysty eldiń 8 óńirinde jergilikti aýqymdaǵy 29 tótenshe jaǵdaı rejımi engizilgen. Bul týraly QR Tótenshe jaǵdaılar mınıstrligi Azamattyq qorǵanys jáne áskerı bólimder komıtetiniń aǵa ofıtseri Erasyl Saıpash Ortalyq kommýnıkatsııalar qyzmetinde ótken brıfıngide aıtty.
«Sońǵy málimet boıynsha, azamattyq qorǵaý qyzmetteri 97 myńnan astam adamdy, onyń ishinde 32 myńnan astam balany qutqaryp, evakýatsııalandy. Qazirgi tańda ýaqytsha ornalastyrý beketterin 7173 adam, onyń ishinde 3494 bala panalap jatyr. Tótenshe jaǵdaılar mınıstrliginiń jáne jergilikti atqarý organdarynyń kúshimen 8 mln 800 myń tekshe metrden astam qar sýy soryldy. 1 mln 400 myńnan astam qap jáne 1 mln 100 tonna ınertti materıal tóseldi», - dedi ol.
TJM ókili tasqyn saldarymen kúreske 15 áýe kóligi tartylǵanyn atap ótti.
«Avarııalyq qutqarý jumystaryna 27 myńnan astam adam, 3 myńǵa jýyq tehnıka jáne 15 áýe kemesi jumyldyrylǵan. Elimizdiń 8 óńirinde: Aqtóbe, Qostanaı, Soltústik Qazaqstan, Ulytaý, Batys Qazaqstan, Aqmola, Qaraǵandy, Atyraý oblystarynda jergilikti aýmaqtaǵy 29 tótenshe jaǵdaı rejımi engizilgen», - dedi Erasyl Saıpash.
