Tasqyn tónip turǵan 8 óńirdiń biri Aqtóbede daıyndyq qalaı
AQTÓBE. KAZINFORM — Aqtóbe oblysynda qorǵanys bógetterin nyǵaıtý jumysy aıaqtalyp keledi. Sonymen birge 2 sý qoımasynyń jobalyq-smetalyq qujaty ázirlenip jatyr.
Aqtóbe oblysy sý tasqyny qaýpi joǵary óńirler tizimine endi. Qazirgi kezde Aqtóbe qalasy men barlyq aýdanda qar shyǵarý, sý sorý jumysy júrip jatyr. Sonymen birge merdigerler bógetti nyǵaıtý jumysyn aıaqtaýǵa jaqyn.
Bógetter qurylysy men nyǵaıtýǵa 7 mlrd teńgeden astam qarjy jumsaldy
Aqtóbeniń aýdandarynda, ásirese byltyr tasqyn bolǵan Qobda, Yrǵyz, Temir, Áıteke bıde bógetter nyǵaıtyldy.
Máselen Áıteke bı aýdany T. Júrgenov aýylyndaǵy Yrǵyz ózeniniń jaǵasyn nyǵaıtýǵa 243,8 mln teńge jumsaldy. Al Qobda aýdanynda 3 bógetke 1,3 mlrd teńge bólindi.
Qazirgi kezde Oral-Oıyl, Saýqaıyn bógetterindegi jumys aıaqtalyp, Batys bógetindegi jumys jalǵasyp jatyr.
— Oıyl aýdanyndaǵy 2 bógette qurylys jumystary aıaqtaldy. Olar Aqkemer jáne Qaratal bógetteri. Bólingen qarjy 1,5 mlrd teńgeden asady. Temir aýdanyndaǵy 7 bógettiń beseýinde, atap aıtar bolsaq, Shubarqudyq, Zadepo, Eńbekshi, Babataı, Qopada jumystar aıaqtaldy. Al Shubarshı, Qumsaı bógetterindegi jumys jalǵasyp jatyr. Bul aýdanda 2,6 mlrd teńgeden astam qarjy bólindi. Yrǵyz aýdanynda Mamyr, Belsher, Quıylys, Yrǵyz, Qutıkól bógetteri salyndy, al Jaısanbaıda jumys áli jalǵasyp jatyr. Munda 1,5 mlrd tg astam qarjy bólindi, — dep habarlady Aqtóbe oblystyq tabıǵı resýrstar jáne tabıǵatty paıdalanýdy retteý basqarmasy.
Sonymen birge 2024 jyly Mártók aýdanyndaǵy Mártók bógetinde kúrdeli jóndeý jumystary aıaqtalyp, nysan qabyldandy.
Alǵa aýdanyndaǵy Sholaq bógetine kúrdeli jóndeý jumystary júrgizildi. Al Temir aýdanynyń Qara bógetine qarjyny demeýshiler bóldi.
Úsh sý qoımasy sý qabyldaýǵa ázir
Aqtóbe, Qarǵaly, Sazdy sekildi iri sý qoımalarynyń bári qazirgi kezde sý qabyldaýǵa ázir.
Aqtóbe sý qoımasyna byltyr jóndeý jumystary júrgizilip, sýdyń besten bir bóligi jiberildi.
— Aqtóbe sý qoımasynyń syıymdylyǵy — 245 mln tekshe metr. Qazirgi tańda 61 mln tekshe metr sý bar, qalǵany bos. Qazgıdromet Aqtóbe sý qoımasyna 200-300 mln tekshe metr aralyǵynda sý keledi degen boljam berip tur. Sonyń 200 mln tekshe metrin biz alyp qalsaq, 100 mln tekshe metr sýdy jiberemiz dep josparlap otyrmyz. 10 kúnde 10 mln tekshe metrden sý jibersek, eshqandaı qaýip tóndirmeıdi. Byltyr 1 táýlikte 180 mln tekshe metr sý keldi. Qarǵaly sý qoımasy jobalyq kólemi — 280 mln tekshe metr. Qazirgi tańda 81 mln tekshe metr sý bar. Qazgıdromet boljamy boıynsha Qarǵaly sý qoımasyna 70-140 mln tekshe metr aralyǵynda sý keledi. Bos kólemimiz 200 mln tekshe metr bolsa, munda tek qana sý jınaımyz. Sazdy sý qoımasynyń jobalyq kólemi — 7,5 mln tekshe metr. Qazirgi tańda 2,5 mln tekshe metr sý bar. Búgingi kúnge qaýip joq dep aıtýǵa bolady, — dedi «Qazsýshar» RMK AOF dırektorynyń orynbasary Tımýr Tileýov.
Sonymen birge óńirde 4 sý qoımasyn salý josparlanǵan:
- Aqtóbe qalasy Jaman Qarǵaly ózenindegi Ólke sý qoımasy.
- Muǵaljar aýdanynda Elek ózeninde Jaryq sý qoımasy.
- Hromtaý aýdanynda Or ózeninde Jambyl sý qoımasy.
- Qobda aýdany Qobda ózeninde Álııa sý qoımasy.
Qazirgi kezde Jaman Qarǵaly ózenindegi Ólke sý qoımasynyń jobalyq-smetalyq qujattamasyna 56 mln teńgeden astam qarjy bólinip, «G6-Project» JShS-i jeńimpaz dep tanyldy.
Sonymen birge Hromtaý aýdany Or ózenindegi Jambyl sý qoımasyn salýǵa arnalǵan jobalyq-smetalyq qujatty «Aqtóbe Joba» JShS-i jasaıdy. Ol úshin 51,4 mln teńge qarastyryldy.
Jedel shtab jumysyn bastady
Aqtóbe oblysynda sý tasqynyna qarsy jedel shtab jumysyn bastady. Aqtóbelikter Ahýaldyq ortalyqtyń 109 jáne tótenshe jaǵdaılar departamentiniń 112 baılanys nómirine habarlasa alady.
Sonymen birge Aqtóbe qalasy men 12 aýdanda uıaly baılanys nómirleri iske qosyldy.
— Aqtóbe qalasynyń Altyn orda aýdanynda áskerı bólimder men ózge de kúsh qurylymdar kómegimen aryqtar tazartyldy. Aqtóbe qalasynda jáne 9 aýdanda muz jarý jumysy júrgizildi. TJD kúsh qurylymy sý tasqynyna daıyn. Búginde 3600-den astam adam, myńnan astam tehnıka, 100-den astam júzý quraly men 440 motosorǵy daıyndaldy. Sonymen birge Aqtóbege Qyzylorda jáne Mańǵystaý oblystarynan kúsh qurylymy keledi. Qandaı da bir aýdanda tótenshe jaǵdaı bolsa sol jerlerge jiberiledi. 17 naýryz kúni 100-ge jýyq adam 30-ge jýyq júzý quraly men motosorǵyny ala keledi, — dedi Aqtóbe oblystyq TJD bastyǵynyń orynbasary Aıbat Jańabergenov.
TJD 12 naýryzdan bastap oblystyń 6 aýdanyna qúsh qurylymyn jiberip jatyr. Buǵan deıin Qobda, Hromtaýǵa bir toby ketse, búgin Oıyl, Yrǵyz, Temirge jolǵa shyqty.
Departament qyzmetkerleri aryq tazalaý, sý sorý, sý arnasyn burý jumystaryn atqarady. Bul jumys tasqyn qaýpi seıilgenge deıin jalǵasady.
— Aqtóbe oblysy boıynsha 58 eldimeken qaýipti aımaqqa kirdi. Jergilikti atqarýshy organdar ol jerlerde bóget salyp, bekitý jumysyn júrgizdi. Sý tasqyny kezeńinde merdigerlerdiń bári sol jerde kezekshilik etedi. Qazir kezekshilik bastaldy. Oblystyq TJD-de de jedel shtab jumys istep jatyr. Adamdar 109 jáne 112 nómirine habarlasa alady. Kún jylyǵan kezde Shalqar jáne Aqtóbe qalasynda kóshelerge sý jınaldy. Habarlama túskende TJD men jergilikti atqarýshy organ birlesip, sý sorý jumysyn júrgizdi. Ol jerge aýlaǵa, úıge sý kirý tirkelmedi, — dedi Aıbat Jańabergenov.
TJD jergilikti atqarýshy organnyń kómegimen jol talǵamaıtyn kólik, júzý quralyn, motosorǵy, arnaıy kıimder alyp, qala men aýdandarǵa taratyldy.
Aıta keteıik, Aqtóbe qalasy men 6 aýdanda tótenshe jaǵdaı rejımi áli saqtaýly.
Aqtóbe qalasynda sý tasqynyna qarsy sharalarǵa 251 mln teńge, al assenızatorlar qyzmetine 300 mln tg qarastyrylyp tur.
Oblysta barlyǵy 58 eldimeken qaýipti aýmaqta. Qazirgi kezde 199 evakýatsııalyq pýnkt ázirlendi.
Qazgıdromet Aqtóbe oblystyq fılıalynyń mamandary 13-18 naýryz aralyǵynda jańbyr jaýyp, kún kúrt jylynatynyn habarlady.
