Tasqyn sý aýmaǵynan kóshirilgenderdiń sany 88 myńǵa taıady

ASTANA. KAZINFORM – Sý tasyǵan óńirlerde adamdardy qaýipsiz jerlerge evakýtsııalaý jáne topan sýmen kúres jumystary jalǵasyp jatyr.

«Sý tasqyny boıynsha saǵat 16:00 jaǵdaı, azamattyq qorǵaý qyzmetiniń kómegimen 88 myńǵa jýyq adam, onyń ishinde 30 myńǵa jýyq bala evakýtsııalandy. Qazir ýaqytsha ornalasý pýnktterinde 7 myńnan astam adam, onyń ishinde 3700 bala bar jáne 4800 adam úıine oraldy. Sondaı-aq, 82 315 úı janýary qaýipsiz jerge aıdaldy. Avarııalyq qutqarý jumystaryna 23 myńnan astam adam jáne 2500-ge jýyq tehnıka, 448 sý sorý, 131 sýda júzý tehnıkasy jáne 6 áýe kemesi jumyldyrylǵan», - dedi Tótenshe jaǵdaılar mınıstrligi Azamattyq qorǵanys jáne áskerı bólimder komıtetiniń aǵa ofıtseri Erasyl Saıpash Ortalyq kommýnıkatsııalar qyzmeti alańynda ótken baspasóz máslıhatynda. 

Brıfıng barysynda aıtylǵandaı, sońǵy táýlikte Tótenshe jaǵdaılar mınıstrliginiń jeke quramynan 525 adam men 100-ge jýyq tehnıka Almaty qalasynan Qaraǵandy, Ulytaý jáne Pavlodar oblysyna jiberildi. Sonymen qatar Qorǵanys mınıstrliginiń 58665 áskerı bóliminiń jeke quramy Astanadan SQO-ǵa jóneltildi. 

«Tótenshe jaǵdaılar mınıstrligi jergilikti atqarýshy organdardyń kúshimen 8 mln-nan astam tekshe metr erigen qar sýy soryldy. 1 mln 200 myńǵa jýyq qum salynǵan qap jáne 1 mln tonnadan astam ınertti materıaldar tóseldi», - deıdi ol. 

Tótenshe jaǵdaılar mınıstrliginiń tańǵy saǵat 10:00-degi málimeti boıynsha tasqyn sý aýmaǵynan 85 myńǵa jýyq adam evakýatsııalandy.