Tasqyn sý Atyraý oblysyndaǵy Qulsary qalasyna kire bastady

ATYRAÝ. KAZINFORM – Atyraý oblysyndaǵy Jylyoı aýdanynyń ortalyǵy – Qulsary qalasyna tasqyn sý kire bastady. 

Jylyoı aýdany ákimdiginiń málimetinshe, Qulsary qalasyndaǵy 2 jáne 3-aýylǵa tasqyn sýdyń kirý qaýpi týyndady.

«Jem ózeniniń arnasynan asyp tasydy. Osyǵan baılanysty aýdandyq jedel shtab Qulsary qalasyndaǵy 2 jáne 3-aýyl turǵyndaryn qaýipsiz aımaqqa kóshirý týraly shtab sheshim qabyldady. Birinshi kezekte áıelder, balalar, naýqas jandar jáne I, II, III-toptaǵy múgedekter kóshiriledi», - dep habarlady aýdandyq ákimdik. 

Turǵyndardy ornalastyrý úshin Qulsary qalasyndaǵy birneshe mektepte qabyldaý pýnkti ashyldy. Evakýatsııalanǵan turǵyndar №1, 5, 6, 8, 9, 16 jáne 18-orta mektepke ornalastyrylady. 

«Qaýipsiz aımaqqa kóshirý jaqyn jol jıeginde qoıylǵan «BatysTehInvest» JShS-niń avtobýstary arqyly júzege asyrylady. Turǵyndardan ózimen birge jeke qujatyn, shaǵyn tósek jáne basqa qajetti zattaryn ala barýy suralady», - dep málim etti aýdandyq ákimdikten.

Tasqyn sý Qulsary qalasyndaǵy ortalyq stadıon aýmaǵyna kirdi. 

Eske sala ketelik, budan buryn tasqyn sýdyń qaýpine baılanysty Jylyoı aýdanynda tótenshe jaǵdaı jarııalandy. Kúndiz Qulsarydan Dossorǵa deıingi joldyń bir bóligin sý basty. 

Sý tasqynynan Jylyoı aýdanynda 5 kásipkerlik nysan, 1 shaqyrym jol búlindi. 

Búgin 5 vagondy poıyz Qulsarydan Atyraýǵa jolaýshylardy tegin tasymaldaıdy. Sondaı-aq Atyraý oblysynyń Jylyoı aýdanynda mektepterdegi sabaq onlaın formatta ótetinin habarlaǵan edik.