Tasqyn kezinde jarylǵan sý qoımasyna jaýapty aqtóbelik kásipker jaýapqa tartyldy
AQTÓBE. KAZINFORM - Maǵadjan sý qoımasyn senimgerlik basqarýǵa alǵan kásipker sottaldy. Bóget byltyr tasqyn kezinde buzylyp, adamdar evakýatsııalanǵan edi.
Hromtaý aýdandyq sotynda Maǵadjan sý qoımasynyń jarylýyna qatysty qylmystyq is qaraldy. Іste aýdan turǵyndary men Hromtaý aýdany ákimdiginiń, elektr qýatymen qamtý mekemesiniń ókilderi jábirlenýshi dep tanylǵan. Sottalýshy Myqtybek Ismaǵambetovke Qylmystyq kodekstiń 254 baby boıynsha aıyp taǵyldy.
Іs materıalyna súıensek, 1885 jyly Hromtaý aýdany Tabantal aýylynan 22 shaqyrym qashyqtyqta Maǵadjan sý qoımasy salynady. Hromtaý aýdandyq qarjy bólimi 2014 jyly sý qoımasyn «Tulpar TK» JShS-ne satyp alý quqyǵynsyn senimgerlik basqarýǵa beredi.
Kelisimshart boıynsha seriktestik nysandy kútip ustap, jóndep, ýaqytyly tehnıkalyq qyzmet kórsetýi tıis. Al 2017 jyly Hromtaý aýdandyq aýyl sharýashylyǵy bólimi men JShS arasynda balyq sharýashylyǵyn damytý týraly kelisimshart jasalady. 2024 jyly naýryzda Aqtóbede qar tez erip, ózenderde sý deńgeıi kóterildi. Sondaı-aq Hromtaý aýdanyndaǵy Maǵadjan sý qoımasynda da dál osyndaı jaǵdaı tirkeldi. 31.03.2024-03.04.2024 jyly aralyǵynda M. Ismaǵambetov TJD, Hromtaý jáne Alǵa aýdandary ákimdikteri, Jaıyq-Kaspıı basseın ınspektsııasyna elektrondy poshta jáne Whatsapp messendjeri arqyly aqparat berip otyrdy. Alaıda M. Ismaǵambetov sýdy aǵyzbady, sońǵy sátke deıin shlıýz jabyq turdy.
- JShS balyq sharýashylyǵymen aınalysady. Dırektory sý qoımasyndaǵy balyq qorynan aıyrylǵysy kelmedi. Sondyqtan ýaqyly sýdy jibermedi. Saldarynan 04.04.2024 jyly sý qoımasy jarylyp, úılerdi sý basty. TJD aqparaty boıynsha Alǵa aýdanynyń Besqospa, Qyzyltý jáne Tabantal aýyldarynan 215 adam, onyń ishinde 96 bala evakýatsııalandy. A. Kadelovaǵa 1 368 000 teńge, K. Kaldanovaǵa 957 000, K. Baıkenovaǵa 700 000, S. Dosqýatovaǵa 1 610 000, S. Aǵalıevaǵa 1 993 000, A. Ganıevaǵa 1 965 000, J. Isenovaǵa 648 000 teńge, sý qoımasyn qalpyna keltirý úshin «Energosıstema» JShS jáne Hromtaý aýdany ákimdigine 200 449 371 teńge múlik shyǵyny keltirildi, - dep jazylǵan sot kabınetindegi iste.
Sot otyrysy kezinde sottalýshy M. Ismaǵambetov ózine taǵylǵan aıyppen kelispedi. Ol 2014 jyldan bastap kúni búginge deıin bıznes jospar jáne kelisimshart boıynsha mindetterin oryndaǵanyn, qajetti tehnıka satyp alyp, jyl saıyn shlıýzdi qoqystan tazartqanyn, tehnıkalyq qyzmet kórsetkenin aıtty. 2024 jyly kóktemde sý bógetine barar jol nashar bolyp, komıssııa quramymen tekserý aktisin jasaı almaǵanıan jetkizdi. 02.04.2024 jyly úsh shlıýzdiń birin 10 sm kótergenimen ekinshisin qozǵamady. 03.04.2024 jyly saǵat 16:00-de úsh shlıýzdiń birin tolyq ashty. 04.04.2024 jyly sý 16 mln tekshe metrge jetti. Sol 4 sáýir kúni Súgirsaı ózeniniń sýy kúrt kóterilip, bóget tolyq buzyldy.
Sottalýshy óz sózinde 2018 jyly oblystyq tabıǵı resýrstar basqarmasyna kúrdeli jóndeý týraly hat jazyp, biraq jaýap bolmaǵanyn jetkizdi. Sonymen birge platınanyń menshik ıesine qujattardy retteýge qatysty ótinish aıtqan.
Sot úkimimen Myqtybek Ismaǵambetov Qylmystyq kodekstiń 254 baby boıynsha aıypty dep tanylyp, 2 jyl 6 aıǵa bas bostandyǵynan shekteý jazasyn taǵaıyndaldy. Sý sharýashylyǵy salasynda 3 jyl jumys isteı almaıdy. Jábirlenýshi dep tanylǵan turǵyndardyń jáne elektrmen qamtý mekemesiniń materıaldyq shyǵyndy óndirý týraly talap aryzy tolyq qanaǵattandyryldy. Hromtaý aýdandyq ákimdiginiń azamattyq aryzy qanaǵattandyrylǵanymen, shyǵyn kólemi azamattyq sotta anyqtalady.
Sot úkimi kúshine engen joq.
Eske salsaq, byltyr kóktemde Maǵadjan sý qoımasy jaryldy. Tún ishinde Alǵa aýdanynda turǵyndar evakýatsııalandy.