Tashkentte TMD Ekonomıkalyq keńesiniń otyrysy ótti
TAShKENT. KAZINFORM – Ózbekstan astanasynda TMD Ekonomıkalyq keńesiniń 105-shi otyrysy ótti, dep habarlaıdy Kazinform agenttiginiń menshikti tilshisi.
Basqosýǵa TMD-ǵa múshe elder úkimet basshylarynyń orynbasarlary, ekonomıka mınıstrleri men atalǵan uıymdaǵy arnaıy ókilderi qatysty. Olar ekonomıkalyq ilgerileýge yqpal etetin ózara is-qımyldar men josparlardy talqylady.
— Delegatsııa basshylary shaǵyn quramda kezdesip, kún tártibindegi mańyzdy máselelerdi talqylady. Atap aıtqanda, TMD sheńberinde 2030 jylǵa deıin ózara ınvestıtsııa tartý jobalaryn yntalandyrý jónindegi keshendik jospar qaraldy. Bul bastamany Ózbekstan prezıdenti Shavkat Mırzıeev kótergen bolatyn. Kezdesý qorytyndysy boıynsha tıisti sheshimder qabyldandy, — dedi TMD Bas hatshysy Sergeı Lebedev BAQ ókilderine arnalǵan baspasóz máslıhatynda.
Onyń aıtýynsha, otyrysta delegattar 20 mańyzdy máseleni sheshý joldaryn izdestirdi. Onyń ishinde aýyr tehnıka shyǵarý, jeńil ónerkásipti damytý jáne densaýlyq saqtaý salasyndaǵy yntymaqtastyqty keńeıtý tujyrymdamalary bar. Sonymen qatar taraptar TMD aıasynda buryn qabyldanǵan keıbir qujattarǵa túzetý engizdi.
— Qamtylǵan barlyq másele boıynsha ázirlengen usynystardy TMD Úkimet basshylary keńesiniń qaraýyna engizý josparlanyp otyr. Qabyldanǵan sheshimder taraptardyń múddesine sáıkes keledi. Ekonomıkalyq baılanystardy nyǵaıtýǵa basymdyq berip otyrǵanymyz beker emes. Óıtkeni, bul bizdiń yntymaqtastyqtyń negizi, — dedi Sergeı Lebedev.
Otyrys qorytyndysy boıynsha 19 qujat qabyldanyp, TMD-ǵa múshe elder yntymaqtastyqty tereńdete túsýge ýaǵdalasty.
Sondaı-aq, kelesi kezdesýdiń ótetin ýaqyty men jeri bekitildi. TMD Ekonomıkalyq keńesiniń kezekti otyrysy bıyl 18 shildede Máskeý qalasynda uıymdastyrylady.
Qosa ketsek, buǵan deıin Qazaqstannyń «TMD +» formatyn qurý bastamasy Dostastyqtyń bedelin arttyrýǵa yqpal etetinin jazyp edik.
Buǵan qosa, TMD-nyń alǵashqy halyqaralyq kınofestıvali Qazaqstanda ótedi.