Tashkentte Qazaqstandaǵy ónerkásiptik revolıýtsııa týraly aıtyldy

TAShKENT. QazAqparat - Tashkentte Qazaqstannyń Ózbekstandaǵy Tótenshe jáne ókiletti elshisi Erik Ótembaev QR Prezıdenti Nursultan Nazarbaevtyń Qazaqstan halqyna «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýyna arnaǵan baspasóz máslıhatyn ótkizdi, dep habarlaıdy «QazAqparat» HAA menshikti tilshisi. 

Konferentsııa barysynda qazaqstandyq dıplomat Ózbekstannyń áleýmettik-saıası, saraptamalyq, ǵylymı-akademııalyq jáne jýrnalıstik toptarynyń ókilderine Qazaqstan Respýblıkasynyń Prezıdenti Nursultan Nazarbaevtyń qazaqstandyq qoǵamdy jańǵyrtý, qazirgi zamanǵy ekonomıkany qalyptastyrý, demokratııalyq damý jáne memlekettik basqarý júıesiniń tıimdiligin arttyrý týraly reforma josparyn tolyqtyryp jatqanyn habarlady.

Sonymen qatar, Erik Ótembaev qonaqtardy Qazaqstanda júzege asyrylyp jatqan reformalardyń, ónerkásiptik revolıýtsııanyń jetistikterin engizý joldaryn, ekonomıkany tsıfrlandyrýdyń, QR-nyń qol jetkizgen jetistikteri men tabystarynyń elimizdiń saıası jáne ekonomıkalyq damý bolashaǵyna áseri týraly baıandady.

«Biz taıaý ýaqytta Qazaqstanda júzege asyrylatyn tórtinshi ónerkásiptik revolıýtsııaǵa arnalǵan QR Prezıdenti Joldaýynyń negizgi jaǵdaıyn talqyladyq. Atalmysh baǵdarlamalyq qujat elimizdi ındýstrııalandyrýǵa, ony tsıfrlandyrýǵa, eń bastysy, memlekettiń áleýmettik rólin nyǵaıtýǵa, sondaı-aq kásipkerlik pen bıznesti damytýǵa jaǵdaı jasaý úshin 10 baǵytty qamtıdy», - dep atap ótti Erik Ótembaev.

Іs-shara sońynda qonaqtarǵa arnaıy ózbek tiline aýdarylǵan QR Prezıdentiniń Qazaqstan halqyna Joldaýy jazylǵan kitapshalar usynyldy.