Tashkentte 157 jyl ishindegi eń joǵary temperatýra tirkeldi

TAShKENT. KAZINFORM – Ózbekstan astanasynda 4 shildede kóleńkede aýa temperatýrasy 43,5 gradýsqa jetip, sońǵy 157 jyldaǵy rekord jańardy. Bul týraly Uzb_Meteo Telegram-kanaly málimdedi.

Onyń aıtýynsha, bul kórsetkish 1868 jyldan beri dál osy kúnge tirkelgen eń joǵary temperatýra sanalady.

Sonymen birge, Tashkenttiń absolıýttik temperatýra rekordyna nebári 1 gradýs jetpeı qaldy: 1997 jyldyń 18 shildesinde qalada 44,6 gradýs tirkelgen bolatyn.

Uqsas temperatýralyq rekord Namangan oblysynda da ornaǵan bolýy múmkin — munda 42,6 gradýs tirkeldi. Bul 2007 jyldyń maýsymynda bolǵan aldyńǵy maksımýmnan 0,1 gradýsqa joǵary.

Ózbekstan aýmaǵyna qatty ystyq 2 shildede Aýǵanstan men Túrikmenstan jaqtan kelgen. Eldiń ońtústik aımaqtarynda aptap ystyq bolǵan, ásirese Termezdegi temperatýra 43 gradýsqa jetken. Navoıı oblysynyń shóldi jerlerinde aýa 47 gradýsqa deıin qyzǵan.

Sınoptıkterdiń boljaýynsha, 6 shildeden bastap respýblıkada kún birtindep salqyndaı bastaıdy.

Aıta keteıik, Ońtústik Koreıada aptap ystyqtan 5 adam qaza tapqanyn jazdyq.

Aptap ystyqqa baılanysty Shveıtsarııa atom elektr stantsııasyn ýaqytsha jaýyp tastady.

Shyǵys Qazaqstan oblysynyń qutqarýshylary aptap ystyqta basqa kún ótýden qalaı saqtaný kerektigin túsindirdi.